काठमाडौँ – संघीय जनमुक्ति पार्टीका अध्यक्ष एमएस थापाले नयाँ शक्ति नेपालका संयोजक डा.बाबुराम भट्टराईले संघीय जनमुक्ति पार्टी नयाँ शक्ति नेपालमा एकीकरण भयो भनेर झुटो प्रचार गरेको बताउनुभएको छ ।
‘काठमाडौँमा पार्टीको दुई दिनदेखि महाधिवेशन चलिरहेको छ, बाबुरामले एकीकरण भएको भनेर गलत प्रचार गरेका हुन्’ अध्यक्ष थापाले भन्नुभयो । भट्टराईले शनिबार साँझ पत्रकार सम्मेलन गरी संघीय जनमुक्ति पार्टी नयाँ शक्तिसँग एकीकरण भएको जानकारी गराएका थिए । पार्टी उपमहासचिव तथा केन्द्रीय प्रचार विभाग प्रमुख टोप अस्लामी मगरका अनुसार भट्टराईको नयाँ शक्तिमा भर्खरै संघीय जनमुक्ति पार्टीमा आएका पर्शुराम तामाङ मात्रै गएका हुन् ।
अहिले बाहिर आएका समाचारमा सत्यता नभएको र धेरै मिडियाहरुले एकपक्षीय र गलत समाचार सम्प्रेषण गरेको उँहाको भनाइ छ । ‘जति पनि पार्टी एकता भयो भनेर समाचार आएका छन् त्यसमा सत्यता छैन’ मगरले भन्नुभयो । पार्टी एकता नभएको भन्दै उनले तत्काल एकता हुने कुनै सम्भावना समेत नरहेको बताए । संघीय जनमुक्ति पार्टीको महाधिवेशन काठमाडौँमा जारी छ ।
