काठमाडौं– बुद्ध जयन्तीको अवसरमा सरकारकाले आयोजना गरेको २५ सय ६० औं बुद्धजयन्ती तथा अन्तराष्ट्रिय बौद्ध सम्मेलन आजदेखि काठमाडौमा सुरु हुँदैछ ।
लगातार तीन दिनसम्म चल्ने सम्मेलनको उदघाट्न अहिले बिहान साढे ८ बजे प्रधानमन्त्री केपी शर्मा ओलीले गर्नुहुनेछ । भगवान बुद्धको जन्मस्थल लुम्बिनीलाई लिएर यसअघि भईरहेको अनावश्यक भ्रम चिर्नका लागि यो सम्मेलन गर्न लागिएको हो ।
बुद्धदर्शनको सुरुवात लुम्बिनीबाट भएको र बुद्धको जन्म मात्र होइन कर्मथलो पनि लुम्बिनी नै हो भन्ने सन्देश विश्व समुदायलाई स्पष्ट रुपमा जानकारी गराउने उदेश्यले सम्मेलनको आयोजना गरिएको संस्कृति, पर्यटन तथा नागरिक उड्डयन मन्त्रालयले जनाएको छ । बौद्ध सम्मेलन आयोजना गर्नुको उदेश्य र महत्वबारे जानकारी गराउँदै संसारभर शान्ति फैलाउन लुम्बिनीले नेतृत्वदायी भूमिका खेल्नुपर्नेमा संस्कृति, पर्यटन तथा नागरिक उड्डयन मन्त्री अग्नी प्रसाद पोखरेलले जोड दिनुभयो ।
आजदेखि सुरु हुने गोष्ठीमा विभिन्न १९ वटा कार्यपत्र प्रस्तुत हुनेछ । लुम्बिनीसहित अन्य बौद्ध सर्किटको प्रबद्र्धन गरी मुलुकको पर्यटन क्षेत्रलाई अन्तराष्ट्रिय जगतमा थप उचाइमा पु¥याउने उदेश्यले आयोजित यस सम्मेलनमा विभिन्न मुलुकका भिक्षु र विश्वविद्यालयका प्राध्यापक एवं सम्बन्धित सरोकारवालाले कार्यपत्र प्रस्तुत गर्ने कार्यक्रम रहेको छ । सम्मेलनमा सहभागी हुन विभिन्न २८ मुलुकका भिक्षु तथा सरकारी प्रतिनिधिहरु काठमाडौंमा भेला भएका छन् ।
तपाईको प्रतिक्रिया
सम्बन्धित समाचार
