समाचार सुन्नुहोस :
काठमाडौँ – क्यारेबियन राष्ट्र हाइटीको राजधानी पोर्ट-ओ-प्रिन्समा पत्रकार सम्मेलनका क्रममा भएको गोलीकाण्डमा तीन जनाको ज्यान गएको छ भने कैयौँ घाइते भएका छन्। यो घटना हाइटीको प्रमुख सरकारी अस्पताल पुनः सञ्चालनको घोषणा गर्ने उद्देश्यले आयोजना गरिएको पत्रकार सम्मेलनका बेला भएको हो। रिपोर्टअनुसार मृत्यु भएका व्यक्तिहरूमा दुई पत्रकार र एक प्रहरी रहेका छन्।
उक्त अस्पताल यसअघि जुलाई महिनामा हिंसात्मक समूहले कब्जा गरेको थियो। घटना भइरहेका बेला स्वास्थ्यमन्त्रीको प्रतीक्षा गरिरहेका पत्रकारहरू बीच अज्ञात व्यक्तिले गोली चलाएका थिए। हाइटी, क्यारिबियन सागरमा अवस्थित एक राष्ट्र, पछिल्ला वर्षहरूमा अस्थिरता र हिंसाका घटनाहरूबाट ग्रस्त हुँदै आएको छ।
