समाचार सुन्नुहोस :
काठमाडौँ – भारतका चर्चित र सफल गायक सोनु निगम पुस १० गते नेपालमा आयोजना हुने सांगीतिक कार्यक्रममा प्रस्तुति दिन नेपाल आउने तयारीमा छन्। क्रिसमसको अवसर पारेर ‘सोनु निगम लाइभ इन नेपाल’ शीर्षकमा आयोजना हुने यस कार्यक्रमलाई लिएर संगीतप्रेमीहरूमा ठूलो उत्साह छ।
बौद्धस्थित हायात होटलको खुला चौरमा हुने उक्त कार्यक्रमका लागि तयारी तीव्र गतिमा अगाडि बढिरहेको छ। स्टेज निर्माणको काम धमाधम भइरहेको आयोजकले जनाएका छन्। कन्सर्टको लागि ७० प्रतिशत टिकट पहिले नै बिक्री भइसकेको र बाँकी टिकटहरू पनि धमाधम बिक्रि भइरहेको कार्यक्रम आयोजकले बताएका छन्।
कार्यक्रमका लागि गेट बेलुकी ४ बजे खुला गरिनेछ भने सोनु निगमले ३ घण्टासम्म आफ्नो प्रस्तुति दिँदै दर्शकहरूलाई मन्त्रमुग्ध बनाउनेछन्। नेपाली टच अष्ट्रेलिया संस्थाका संस्थापक तथा संगीतकर्मी राज के गोस्वामीले यो कन्सर्टलाई भव्य बनाउन कुनै कसर बाँकी नराखिएको बताए।
सोनु निगम बुधबार मुम्बईबाट काठमाडौं आउँदैछन्। उनले त्यही रात १० बजे स्टेजमा प्रस्तुति दिनेछन् र बिहीबार स्वदेश फर्किनेछन्। आयोजकले कार्यक्रममा झण्डै १० हजार दर्शकको सहभागिता रहने अनुमान गरेको छ।
