धादिङको कृष्णभीरमा ग्यासको बुलेट दुर्घटना, सतर्कता अपनाउन आग्रह

समाचार सुन्नुहोस : 

काठमाडौँ – चितवनबाट काठमाडौं जाँदै गरेको भारतीय ग्यास बुलेट धादिङमा दुर्घटनाग्रस्त भएको छ। पृथ्वी राजमार्गस्थित धादिङको बेनिघाट रोराङ गाउँपालिका–७, कृष्णभीरमा आज बिहान ग्यास बुलेट सडकबाट तल खसेको हो। गाडीको केही भाग भीरमा अड्किएर रहेको छ। यद्यपि घाइते कोही पनि भेटिएको छैन ।

जिल्ला ट्राफिक प्रहरी कार्यालय गजुरीका अनुसार चालक र सहचालकको खोजी कार्य जारी छ। दुर्घटनास्थलमा उद्धार प्रयास भइरहेको छ। प्रहरी निरीक्षक सुरज श्रेष्ठले नजिकका बासिन्दालाई सतर्क रहन आग्रह गरेका छन्।

यदि ग्यास चुहावटको कुनै संकेत देखिएमा तत्काल प्रहरीको १०० नम्बरमा जानकारी दिन अनुरोध गरिएको छ। स्थानीय क्षेत्रको सुरक्षा सुनिश्चित गर्न थप सतर्कता अपनाइएको छ।