सुन, चाँदी र विदेशी मुद्रासहित कैलालीबाट तीनजना पक्राउ

समाचार सुन्नुहोस : 

काठमाडौँ – कैलालीको भजनी नगरपालिका–५ को कौवाखेडा सीमाक्षेत्रबाट ठूलो मात्रामा सुन, चाँदी र विदेशी मुद्रासहित तीन व्यक्ति पक्राउ परेका छन्। सशस्त्र प्रहरी बलका सहप्रवक्ता शैलेन्द्र थापाका अनुसार पक्राउ पर्नेमा सुर्खेतका महेन्द्रबहादुर शाही (३६), हर्कबहादुर विक (३१) र महेश सुनार (३२) छन्। ती व्यक्ति भारतबाट नेपाल प्रवेश गर्दै गर्दा सशस्त्र प्रहरीले नियन्त्रणमा लिएको हो।

पक्राउ परेकाहरूको साथबाट ८० लाख ७९ हजार रुपैयाँबराबरको ६२० ग्राम सुन, १५ लाख २८ हजार रुपैयाँबराबरको ८.९१४ किलोग्राम चाँदी, ६ लाख ११ हजार ६२५ भारतीय रुपैयाँ, केही साउदी रियाल, चार थान मोबाइल सेट र चाँदीका लेप लगाएका भाँडाहरू फेला परेका छन्। प्रहरीले घटनाबारे थप अनुसन्धान भइरहेको जानकारी दिएको छ।