टोकियो – जापानका प्रधानमन्त्री शिगेरु इशिबाले बुधबार स्वास्थ्य परीक्षण गराएका छन् । भर्खरै औपचारिक रूपमा प्रधानमन्त्रीमा पुनः निर्वाचित भएका इशिबाले पाँच दिनभित्र दोस्रो पटक स्वास्थ्य परीक्षण गराएका हुन् ।
यसअघि उनी यसै हप्ता संसद्को सत्रको क्रममा निदाएको जस्तो देखिएका थिए, जसले उनको स्वास्थ्यप्रति चिन्ता उत्पन्न गरेको थियो । सरकारका प्रमुख प्रवक्ताले ६७ वर्षीय प्रधानमन्त्रीको स्वास्थ्यमा कुनै समस्या नरहेको भन्दै आश्वस्त पारेका छन् । लिबरल डेमोक्रेटिक पार्टी र त्यसको सहायक गठबन्धन साझेदारहरूले गत अक्टोबर २७ को आम निर्वाचनमा आफ्नो बहुमत गुमाएका थिए ।
मुख्य क्याबिनेट सचिव योशिमासा हायाशीले बुधबार एक पत्रकार सम्मेलनमा इशिबाले टोकियोको स्वास्थ्य केन्द्रमा करिब ३० मिनेट लामो स्वास्थ्य परीक्षण गराएको बताए । उनकाअनुसार परीक्षणले प्रधानमन्त्रीको आधिकारिक जिम्मेवारीमा कुनै असर पारेको छैन ।
उनी गत शनिबार पनि टोकियोको एक अस्पतालमा झन्डै १ घण्टा ५० मिनेटको स्वास्थ्य जाँचका लागि भर्ना भएका थिए । बुधबार फेरि स्वास्थ्य जाँच गराउनुको कारणबारे सोध्दा हायाशीले भने, ‘यो पहिले नै निर्धारण गरिएको नियमित स्वास्थ्य परीक्षण हो भन्ने मैले जानकारी पाएको छु ।’
