समाचार सुन्नुहोस :
काठमाडौँ – नेपाली कांग्रेसका महामन्त्री गगन थापाले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ को कारण नेकपा (एकीकृत समाजवादी) का अध्यक्ष माधव कुमार नेपालले प्रधानमन्त्री बन्ने अवसर गुमाएको टिप्पणी गरेका छन् । आज (मंगलबार) पार्टीको प्रशिक्षण कार्यक्रमलाई सम्बोधन गर्दै उनले कांग्रेस–माओवादीसहितको सरकार हुँदा प्रचण्डपछिको प्रधानमन्त्री माधव नेपाल र त्यसपछि पार्टी सभापति शेरबहादुर देउवा प्रधानमन्त्री बन्ने सहमति भएको स्मरण गराए । उनले उक्त सहमतिमा प्रचण्ड इमानदार हुन नसकेको आरोप लगाए ।
उनले भने, ‘प्रचण्डपछिको प्रधानमन्त्री माधव नेपाल र त्यसपछि पार्टी सभापति शेरबहादुर देउवा प्रधानमन्त्री बन्ने सहमति भएको थियो। माओवादी र समाजवादीसँग सहकार्य गरेर ०८४ सालसम्म सँगै जाने भनिसकेपछि कांग्रेसलाई आगामी निर्वाचनसम्म एक्लै प्रधानमन्त्री बन भनेर पटक-पटक आएको प्रस्ताव स्वीकार गरेनौं। तर, हामी समझदारीमा बाँधिएका थियौं। एकपटक समझदारी गरेपछि हामी इमान्दार भयौं। हामीले इमान्दारिता राख्यौं। हाम्रो इमान्दारितालाई कमजोरी नठान्नु।’
उनले एमाले र माओवादी सँगै रहन नसक्ने कुरा पटक पटक प्रमाणित भइसकेकाले कांग्रेस एमाले मिल्नुको विकल्प नभएको बताएका छन् ।
