समाचार सुन्नुहोस :
काठमाडौँ – काठमाडौं उपत्यकामा पेट्रोलको अभाव देखा परेको छ, जसको मुख्य कारण ट्यांकर व्यवसायीहरूका विभिन्न संघ संस्थाको विरोध हो। थानकोटबाट पेट्रोल आपूर्ति गर्ने ट्यांकर व्यवसायीहरूले आफ्नो सेवा रोकेपछि उपत्यकामा पेट्रोल अभाव भएको छ। शनिबारदेखि ट्यांकर चालकहरूले विभिन्न माग राखेर आन्दोलन सुरु गरेका छन्, जसका कारण पेट्रोलियम पदार्थको अभाव भएको हो।
चालकहरूले पेट्रोलियम पदार्थ ढुवानी गर्ने ट्यांकर सञ्चालन नगरेका कारण पेट्रोलियम पदार्थ पम्पहरूसम्म पुग्न सकेको छैन। नेपाल पेट्रोलियम ट्यांकर चालक संघले सातबुँदे माग राख्दै शनिबारदेखि आन्दोलन थालेको छ। संघले एक विज्ञप्ति मार्फत शनिबार कालोपट्टि बाँधेर, आइतबार गाडीमा कालो झन्डा राखेर र सोमबार पूर्ण रूपमा काम छाडेर ट्यांकरको साँचो सवारीधनीलाई हस्तान्तरण गरेर विरोध गर्ने जनाएको छ।
चालकहरूले लामो समयदेखि अत्यावश्यक सेवासुविधा नपाएको र नेपाल आयल निगममा लामो समयदेखि असन्तुष्टिका साथ काम गरेको भन्दै विरोध जनाएका छन्।
