समाचार सुन्नुहोस :
काठमाडौँ – महोत्तरीमा एक युवकमाथि दिनदहाडै गोली प्रहार भएको छ। जिल्लाको गौशाला नगरपालिका-११ भरतपुरका ३० वर्षीय विनय महतो (मुरारी) माथि मराहा खोलामा गोली प्रहार भएको जानकारी महोत्तरी प्रहरीका प्रवक्ता डीएसपी सन्तुलाल जयसवारले दिएका छन्।
गोली कम्मरमा लागेर उनी गम्भीर घाइते भएका छन् र उनलाई उपचारका लागि जनकपुर पठाइएको छ। आज साँझ करिब ६ बजे घरबाट गौशाला बजारतर्फ जाँदै गर्दा मराहा खोलामा दुईवटा मोटरसाइकलमा आएका हतियारधारी समूहले लुटपाटको प्रयास गर्दै गोली प्रहार गरेको बताइएको छ।
यस क्रममा उनले लगाएको सुनको ब्रासलेट र सिक्री लुटिएको छ। महोत्तरी प्रहरीले घटनाको थप अनुसन्धान गरिरहेको छ।