टोकियो – जापान सरकारले फुजी हिमालमा पर्यटक आगमन सीमित बनाउने भएको छ । पछिल्लो समय आरोहीहरूको संख्या बढिरहेकै बेलामा सरकारले संख्या सीमित बनाउन आरोहीहरूसँग शुल्क लिने भएको हो ।
आगामी सिजनदेखि फुजी हिमाल चढ्न चाहने हरेक आरोहीले १३ डलर तिर्नुपर्नेछ । आरोहणको अनुमति दिइने संख्यामा पनि सीमा तोकिने भएको छ । गतवर्ष जुलाईदेखि सेप्टेम्बरको बीचमा २ लाख २० हजारले फुजी हिमाल चढेका थिए । आरोहीहरूको उच्च भिडभाड, चोटपटकका घटनामा वृद्धि र पदमार्गमा बढेको फोहोर देखेर दिक्क हुँदै सरकारले यो कदम चालेको हो ।
यो वर्ष योशिदा टे«लबाट एक दिनमा ४ हजार आरोहीलाई मात्रै अनुमति दिइने भएको छ । यो ट्रेलमा राजधानी टोकियोबाट सजिलै जान सकिन्छ । ६० प्रतिशतभन्दा धेरै आरोहीहरू यही ट्रेल भएर फुजी हिमाल चढ्न जाने गरेका छन् । गएको वर्ष आरोहीहरूको अत्यधिक भिडभाडका कारण शिजुओका प्रिफेक्चर प्रहरीलाई उद्धारको मागसहित ६१ ओटा फोन आएको थियो ।
आरोहीलाई लेक लागेको, हाइपोथर्मिया वा आवश्यक तयारी बिनै हिमाल चढ्न गएपछि उत्पन्न समस्याबारे धेरै फोन आएका थिए । पछिल्लो समय पयर्टकहरूको भिड थेग्न नसकेपछि कयौं देशहरूले शुल्क लगाउने वा आगन्तुकको संख्या सीमा तोक्ने लगायतका घोषणाहरू गरिरहेका छन् । सन् २०२३ को सिजनमा आरोहणका क्रममा धेरै आरोहीको मृत्यु भएपछि माउन्ट फुजी चढ्न दिइएको अनुमतिबारे प्रश्न उठिरहेको छ ।
