काठमाडौं – नेकपा एकीकृत समाजवादीका अध्यक्ष माधव नेपालसँगको भेट सकारात्मक भएको कांग्रेसले बताएका छ । केही बेरअघि नेपाल निवास कोटेश्वर पुगेको कांग्रेस सभापति शेरबहादुर देउवा, नेत्री आरजु देउवा र नेता रमेश लेखकको टोलीले वार्ता सकारात्मक भएको बताएको हो ।
भेटवार्तामा सहभागी कांग्रेस नेता रमेश लेखकले कुराकानी सकारात्मक भएको बताए । ‘परिवर्तित विकसित राजनीतिक घटनाक्रमका बारेमा छलफल भएको हो,’ उनले सञ्चारकर्मीहरूसँग भने, ‘सकारात्मक कुराकानी भएको छ । यसलाई निरन्तरता दिन्छौं ।’
प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले कांग्रेस र एकीकृत समाजवादीसहितको गठबन्धन तोडेर नेकपा एमाले र रास्वपासहितको नयाँ गठबन्धन बनाएर मन्त्रिपरिषद् पुनर्गठन गरेका छन् । नयाँ गठबन्धनमा माधव नेपाल नेतृत्वको एकीकृत समाजवादीलाई पनि सामेल गराउन एमाले र माओवादीका शीर्ष नेताहरू सक्रिय भएको बेला देउवाले नेपाललाई भेटेका हुन् ।
कांग्रेसले माधव नेपाललाई नयाँ गठबन्धनमा जानबाट रोक्ने प्रयासमा गरेको बुझिएको छ । केन्द्रको नयाँ सत्ता समीकरण अनुसार प्रदेश सरकारमा पनि सरकार परिवर्तनको प्रयास भइरहे पनि कतिपय प्रदेशमा एकीकृत समाजवादी निर्णायक देखिएको छ । त्यसैले देउवा र नेपालबीचको भेटलाई अर्थपूर्ण मानिएको छ ।
