टोकियो – गल्कोट समाज जापानले ११४औं अन्तर्राष्ट्रिय नारी दिवसको अवसर पारेर अनलाइन अन्तरक्रिया गर्ने भएको छ । समाजले आउँदो मार्च ८ तारिख शुक्रबारका दिन ‘जुम अनलाइन कार्यक्रम’ गर्ने भएको हो ।
विशेषतः जापानमा भर्खरै आएका र आउन चाहनेहरूलाई फाइदा पुगोस् भन्ने हेतु ‘जुम अनलाइन कार्यक्रम’ गर्न लागिएको समाजले जनाएको छ । जापान आउनु पूर्व तयारी र जापान आइसकेपछि जापान बसाईमा अनुशासन कानुनी पाटो र अनुशरण, नेपाली महिलाहरूको गर्भ अवस्था र बच्चा जन्मिएपछिको हेरचाह, जापानमै हुर्कँदै गरेका बालबालिकाहरूको संस्कार, संस्कृति र भाषा सम्बन्धी जान्नुपर्ने कुराहरू बारे सम्बन्धित क्षेत्रका ज्ञाताहरूले अभिमुखीकरण गर्ने समाजले बताएको छ ।
अनलाइन कार्यक्रममा अन्तर्राष्ट्रिय अधिवक्ता डा. बलराम श्रेष्ठले जापान बसाइमा अनुशासन कानूनी पाटो र अनुसरण, जनस्वास्थ्यविद् डा. एलिजा केसी भण्डारीले जापानमा भूकम्प प्रकोपको पूर्व तयारी, गल्कोट समाजका अन्तर्राष्ट्रिय संयोजक बेलुकाजी थापाले नारी हकहित पदीय जिम्मेवारी र भूमिका र एनआरएनए एसिया प्यासिफिक महिला संयोजक अनिता गुरुङले सामाजिक अभियानमा महिला नेतृत्व र चुनौती विषयमा अभिमुखीकरण गर्ने छन् ।
यसैगरी नेपाल पत्रकार महासंघ जापान शाखाका केन्द्रीय पार्षद् सदस्य मनिषा चौलागाईंले जापानमा नेपाली समुदायमा आत्महत्या बढ्दो क्रममा विषयमा, पत्रकार तथा अनेसास सचिव संगीता कुँवरले जापानमा गर्भावस्था र बच्चा जन्मेपछिको आफ्नो अनुभव राख्नेछिन् भने सामाजिक व्यक्तित्व मेलिसा बास्तोलाले जापानमा हुर्कँदै गरेका बालबालिकाहरूको संस्कार, संस्कृति र भाषाको विषय तथा कास्की समाज जापानका अध्यक्ष तथा जापान विद्यार्थी भिसा विशेषज्ञ कमल बास्तोलाले जापान आगमनका पूर्व तयारी विषयमा जानकारी गराउने समाजले उल्लेख गरेको छ ।
गल्कोट समाज जापान नागोया क्षेत्रीय कार्यसमिति सदस्य शर्मिला बस्नेतले कार्यक्रमको उद्देश्यमाथि प्रकाश पार्ने तय भएको छ भने गल्कोट समाज जापानकी उपाध्यक्ष चन्द्रा अधिकारी केसीले कार्यक्रम संयोजक तथा सञ्चालन गर्नेछन् ।***
