काजाब्लांका क्यासेल्लो – ‘तमु ल्होसार’ बेल्जियममा विभिन्न सांस्कृतिक र मनोरञ्जनात्मक कार्यक्रमसहित भव्य रूपमा मनाइएको छ । तमु समाज बेल्जियमले डोन बोस्को काजाब्लांका क्योसेल्लोमा आयोजना गरेको २६०८औं गुरुङ वर्गको तमु ल्होसारमा तमु भेषभूषा, संस्कार र संस्कृति झल्कने सांस्कृतिक झाँकी, र कार्यक्रम सहित तमु नयाँ वर्षको शुभकामना साटासाट गर्दै मनाइएको हो ।
कार्यक्रममा बेल्जियममा बसोबास गर्ने गुरुङ समुदायका साथै विभिन्न जातीय, सामाजिक, राजनैतिक र सामुदायिक संघ संस्थाहरूको सहभागिता रहेको थियो । विभिन्न परम्परागत भेषभुषामा सजिएका गुरुङ समुदायका महिला र पुरुषहरू एवम् बालबालिकाहरूको उपस्थितिले कार्यक्रम निकै मनमोहक र भव्य देखिएको थियो ।
कार्यक्रमका प्रमुख अतिथि बेनेलक्स तथा युरोपियन युनियनका लागि नेपाली राजदूत गेहेन्द्र राजभण्डारी, विशेष अतिथि एनआरएनए बेल्जियमकी अध्यक्ष सीता सापकोटा,आदिवासी जनजाति महासंघ बेल्जियमका अध्यक्ष वीरमान घर्ती मगर र समाजका अध्यक्ष होम गुरुङ, समाजका अग्रज अभिभावक क्याप्टेन जोगमान गुरुङ, संस्थापक अध्यक्ष मीन गुरुङद्वारा विशेष पूजा र दीप प्रज्वलन गरेर उद्घाटन गरिएको कार्यक्रम, नेपाली राष्ट्रिय गीत र गुरुङ भाषाको राष्ट्रिय गीत बजाउँदै आरम्भ भएको थियो ।
तमु ल्होसारको शुभकामना दिँदै प्रमुख अतिथि राजदूत राजभण्डारी सांस्कृतिक सम्पदाको धनी तमु समुदायले प्रवासमा आफ्नो कला र संस्कृति झल्कने गरी आयोजना गरेको भव्य कार्यक्रममा सहभागी हुँदा खुसी लागेको बताए । गैर आवासीय नेपाली संघ बेल्जियमका अध्यक्ष सीता सापकोटा, नेपाल आदिवासी जनजाति महासंघ बेल्जियमका अध्यक्ष वीरमान मगरले तमु ल्होसारको शुभकामना दिएका थिए ।
एनआरएनए आईसीसी उपाध्यक्ष गंगाधर गौतम, निवर्तमान ग्लोबल युवा उपाध्यक्ष हिमाल गुरुङलगायत नेदरल्यान्ड ,जर्मनी, लक्जेम्बर्ग, फ्रान्स, पोर्चुगल, माल्टा, बेलायतलगायतबाट झन्डै १०० संघसंस्थाबाट कार्यक्रममा पाहुना र सहभागिता रहेको थियो ।
सोही कार्यक्रममा तमु समाज बेल्जियमको स्मारिकाको दोस्रो अंक ‘आशिमाला २’ र समाजका पूर्व अध्यक्ष पदम गुरुङ ‘प्रवासी’द्वारा लिखित गुरुङ भाषाको अन्य तीन भाषा- नेपाली, अंग्रेजी र नेदरल्यान्डमा अर्थ खोज्न मिल्ने शब्दकोश ‘नमस्ते’को विमोचन गरिएको थियो । आशिमाला २ को सम्पादन मनिराज गुरुङले र प्रकाशनको संयोजन समाजका पूर्व अध्यक्ष बालेन्द्र गुरुङले गरेका हुन् ।
कार्यक्रम व्यवस्थापनमा सहयोग गर्ने र प्रायोजकहरूलाई मायाको चिनो सहित सम्मान गरिएको थियो । ल्होसार कार्यक्रममा उपस्थित अतिथिहरूलाई संस्थाको तर्फबाट उपाध्यक्ष सूर्य गुरुङ र आमा समूहकी प्रमुख मन्दिरा गुरुङले स्वागत गरेका थिए । उपाध्यक्ष चित्र गुरुङले तमु संस्कृति र संस्कारको बारेमा विवेचना गरेका हुन् ।
समाजका अध्यक्ष होम गुरुङले उपस्थित अतिथिहरू, प्रायोजकहरू र सहयोगीहरू लगायत कार्यक्रम सफल बनाउन योगदान दिने सबैलाई धन्यवाद दिँदै मिलेर बसेको नेपाली समाजलाई विभाजन गर्ने प्रयास कतैबाट पनि नहोस् भन्ने काम गरे । समाजका अध्यक्ष होम गुरुङको सभापतित्वमा भएको ल्होसार कार्यक्रमको सञ्चालन महासचिव चित्रजङ गुरुङ, सचिव उमा गुरुङ र सांस्कृतिक कार्यक्रमको सञ्चालन रिचा गुरुङले गरेका थिए ।
गायक नारायण धिताल, दुर्गा गुरुङ र गायिका अनु गुरुङ, अनिता घले गुरुङ लगायतले विविध प्रस्तुति दिएको कार्यक्रममा विभिन्न सांस्कृतिक नृत्यहरू प्रस्तुत गरिएको थिए ।
तपाईको प्रतिक्रिया
सम्बन्धित समाचार
