काठमाडौँ – हमासले युद्ध समाप्त नभएसम्म बन्धकहरूलाई रिहा नगर्ने बताएको छ । इजरायलले गाजामा पूर्णरुपमा आक्रमण अन्त्य नगरेसम्म बाँकी रहेका बन्धक रिहा गर्न हमासले अस्विकार गरेको हो । गत ७ अक्टोबरमा हमासले इजरायलबाट अपहरण गरेका अझै १ सय २० जना उसको नियन्त्रणमा रहेको इजरायलको दाबी छ । हमासले विज्ञप्ती जारी गर्दै आक्रमण रोक्ने सहमति भएपछि मात्रै बन्दी आदानप्रदानबारे सम्झौता हुन सक्ने स्पष्ट पारेको हो । विश्व शक्ति राष्ट्रले हमासलाई बन्दी रिहाको लागि दबाब दिइरहेका छन् ।
इजरायलको लगातारको आक्रमणले गाजा क्षेत्रमा मानवीय संकट चुलिदै गएपछि इजिप्टको कायरोमा नयाँ युद्धविरामका लागि वार्ता भइरहेको छ । यद्यपी वार्तामा अहिलेसम्म सहमति जुट्न सकेको छैन । पहिलो चरणमा भएको युद्धविरामपछि इजरायलले बन्धक बनाएका सय भन्दा बढीलाई मुक्त गरेको थियो भने हमासले थोरै संख्यामा बन्दी रिहा गरेको थियो । युद्धविरामका सम्झौता पालना नगरेको भन्दै आक्रोशित भएको इजरायले त्यसयता लगातार आक्रमण बढाएको छ ।
इजरायलको आक्रमणबाट पछिल्लो समय २ हजारभन्दा बढी हमास लडाकुको मृत्यु भइसकेको बीबीसीले जनाएको छ ।
