काठमाडौं – हिमालय एयरलाइन्सले चीनमा आफ्नो गन्तव्यमा उडान विस्तार बढाउँदै लगेको छ । नेपाल र चिनियाँ लगानीको हिमालय एयरलाइन्सले काठमाडौं-सांघाई-काठमाडौं उडान सुरु गर्न लागेको हो ।
अमेरिकाको न्युयोर्कपछि चीनको सांघाई विश्वकै ठूलो आर्थिक केन्द्र मानिन्छ । सांघाईमा विश्वका ठूलठूला कम्पनीका कार्यालयहरू रहेका छन् । हिमालय एयरलाइन्सको सांघाई उडानले नेपाललाई विश्वको दोस्रो ठूलो आर्थिक केन्द्रसँग सिधै जोडेको छ, जसबाट नेपालले आर्थिक तथा व्यावसायीक लाभि लिन सक्नेछ ।
हिमालय एयरलाइन्सका अनुसार डिसेम्बर २ बाट नियमित उडान सुरु गर्ने जनाएको छ । एयरलाइन्सले काठमाडौं–संघाई उडान नेपाल र चीनबीच कनेक्टिभीटी बढाउने सहयोग पुग्ने बताएको छ ।
हिमालयले सुरुमा हप्ताको एक उडान गर्ने र डिसेम्बर २७ पछि हप्ताको २ उडान गर्ने जनाएको छ । हरेक बुधबार र शनिबार उडान गर्ने छ । कम्पनीले हाल बेइजिङ र क्विङडाओमा नियमित उडान गरिरहेको छ । जनसंख्याको हिसाबले चीनको राजधानी बेइजिङ भन्दापनि ठूलो सहर सांघाई हो । डिसेम्बर भित्रै चोङक्विङमा उडान गर्ने तयारी गरेको छ । ‘डिसेम्बर २ बाट सांघाईमा नियमित उडान हुन्छ,’ हिमालय एयरलाइन्सका उपाध्यक्ष विजय श्रेष्ठले भने, ‘डिसेम्बर अन्तिमबाट चोङक्विङसहित ४ वटा गन्तब्यमा नियमित उडान हुन्छ ।’
हिमालय एयरलाइन्ले सांघाई-काठमाडौंमा मुख्यत चिनियाँ पर्यटक हुने विश्वास गरेको छ । कोभिड माहामारीको समयमा चीनबाट पर्यटक आगमन घटेकोमा २०२३ मा पर्यटक आगमन बढ्दै गएको छ । अक्टुबरमा चीनबाट ६ हजार ८८० पर्यटक नेपाल भित्रिएका थिए । ‘सांघाई व्यावसायिक सहर हो । मुख्यत चिनियाँ पर्यटक नै बढी यात्रु हुन्छन् । दोस्रोमा व्यवसायी हुन्छन्,’ श्रेष्ठले भने, ‘यात्रुको आउजाउ बढ्दै गएकाले नयाँ गन्तव्यमा यात्रुको कमि हुँदैन ।’
