समाचार सुन्नुहोस् :
काठमाडौँ – विभिन्न माग राखी यही असोज ३ गतेदेखि आन्दोलनमा रहेको नेपाल शिक्षक महासङ्घ र सरकारबीच हिजो बिहिबार भएको वार्ता सकारात्मक निश्कर्षसहित टुङ्गिएको छ ।
कानून, न्याय, तथा संसदीय मामिला मन्त्री धनराज गुरुङले महाङ्घसँगको हिजोको छलफल सकारात्मक रहेको र आज शुक्रबार बिहान फेरी वार्तामा बसेर सहमति गर्ने टुङ्गो लागेको बताए । “आज सकारात्मक छलफल भएको छ । बिहानको भन्दा अहिले बुँदागत रुपमा छलफल भएको छ । उहाँहरूले जुन माग राख्नुभएको थियो, त्यसैमा रहेर आज छलफल भएको छ । भोलि बिहानसम्म टुङ्गिन्छ”, उनले बिहिबार पत्रकारहरु संग भने ।
त्यस्तै, शिक्षा, विज्ञान तथा प्रविधिमन्त्री अशोककुमार राईले पनि छलफल सकारात्मक रहेकाले समस्याका समाधान हुनेमा आशावादी रहेको बताए । उपप्रधान तथा गृहमन्त्री नारायणकाजी श्रेष्ठ र अर्थ मन्त्री डा प्रकाशशरण महत पनि वार्तामा सहभागी थिए । शिक्षक महासङ्घ र सरकारका बीच हिजो बिहान पनि वार्ता भएकोमा सहमति जुट्न सकेको थिएन ।
