काठमाडौं – नेपालमा रेल सेवा थप १७ किलोमिटर विस्तार भएको छ । भारतको जयनगरबाट जनकपुर हुँदै कुर्थासम्म चल्दै आएको रेल अब महोत्तरीको भङ्गाहा बिजलपुरासम्म चल्ने छ । आइतबार जयनगर-कुर्था-भंगहा (बिजलपुरा) रेल्वे सेवा आइतबारदेखि विधिवत् रूपमा उद्घाटन गरिएको हो ।
भौतिक पूर्वाधार तथा यातायातमन्त्री प्रकाश ज्वालाले सेवा विस्तारको आइतबार उद्घाटन गरेका छन् । जयनगर-जनकपुरधाम-कुर्थासम्मको ३५ किलोमिटरमा १५ महिनादेखि सञ्चालनमा हुँदै आएको रेल सेवा अब थप १७ किलोमिटरसमेत गरी ५२ किलोमिटर लामो दूरीमा सञ्चालन हुनेछ ।
दोस्रो चरणको भौतिक पूर्वाधार निर्माण भइसकेपछि सेवा बिजलपुरासम्म विस्तार गरिएको रेलवे कम्पनीका महाप्रबन्धक निरञ्जन झाले जानकारी दिए । तर जग्गाको मुआब्जा विवादको कारण तेस्रो चरणको बिजलपुराबाट बर्दिबाससम्मको रेलवे पूर्वाधार निर्माण भने रोकिएको छ ।
विस्तारित रेल सेवाको आइतबार उद्घाटन गर्दै मन्त्री ज्वालाले रेल सेवा विस्तारले नेपाल-भारतबीचमा थप सुमधुर सम्बन्ध बनेको बताए । रेल सेवा विस्तारले दुवै तर्फका जनताले प्रत्यक्ष लाभ लिने मन्त्री ज्वालाको भनाइ छ ।
रेलवे कम्पनीका महाप्रबन्धक झाका अनुसार अब बिजलपुराबाट हरेक दिन बिहाने ७ः३० बजे रेल छुट्नेछ । बिजलपुराबाट छुटेको रेल कुर्था र जनकपुर हुँदै जयनगरसम्म पुग्नेछ । जयनगरदेखि जनकपुर-कुर्था-बिजलपुरा रुटमा दैनिक ६ पटक रेल गुड्ने झाको भनाइ छ ।
तपाईको प्रतिक्रिया
सम्बन्धित समाचार
