काठमाडौं । यूरोनियमको कारोबारमा संलग्न भएको आरोपमा प्रहरीले कांग्रेसका नेता नवराज महतसहित आठ जनालाई पक्राउ गरेको छ । प्रहरीको विशेष ब्युरोले सोमबार हायात होटलबाट दुई केजी आठ सय ग्राम युरोनियम बरामद गरी त्यसमा संलग्नहरूलाई पक्राउ गरेको हो ।
सो यूरोनियम भारतमा बिक्रीका लागि प्रतिकेजी ३५ करोडमा डिल भएको थियो । साढे दुई किलाको करिब ८५ करोड रुपैयाँमा कारोबारको डिल भएको प्रहरीको दाबी छ । सुरुमा प्रहरीले महत र भूपेन्द्र खड्कालाई पक्राउ गरेको थियो । थप ६ जना पछि पक्राउ परेको महानगरीय प्रहरी परिसर काठमाडौँका एसपी दिनेशराज मैनालीले बताए । महत ललितपुर कांग्रेसका नेता हुन् ।
पक्राउ पर्ने अन्यमा सिन्धुपाल्चोकका रामकृष्ण लामिछाने, सिराहाका गोपीलाल दास, जिवछ नारायण यादव, महोत्तरीका सुरेन्द्र चौरी, भारतका उपेन्द्र कुमार मिश्र र महोत्तरीका राजु ठाकुर छन् । उनीहरूबाट बा ५ च ८२०९ नम्बरको कार पनि प्रहरीले बरामद गरेको छ ।
पक्राउ परेकालाई ‘रेडियोधर्मी पदार्थ (उपयोग तथा नियमन) ऐन, २०७७ अन्तर्गत मुद्दामा सात दिनको म्याद थप अनुमति लिई प्रहरी वृत्त बौद्धबाट थप अनुसन्धान भइरहेको एसपी मैनालीले जानकारी दिए ।
