काठमाडौं – स्वास्थ्य तथा जनसंख्या मन्त्रालयले कोभिड-१९ को नेपाल भेरियन्ट नरहेको प्रष्ट पारेको छ । अन्तर्राष्ट्रिय सञ्चारमाध्यमले नेपाल भेरियन्ट भेटिएको भन्दै समाचार सम्प्रेषण गरेपछि मन्त्रालयले अहिलेसम्म नेपाल भेरियन्ट नरहेको प्रष्ट पारेको हो ।
मन्त्रालयका प्रवक्ता डा. कृष्णप्रसाद पौडेलले अहिलेसम्म नेपालमा युके भेरियन्ट र भारतीय भेरियन्टबाहेक अर्को भेरियन्ट नभेटिएको बताए । कोरोना भाइरसको नेपाल भेरियन्ट बेलायतसहितका युरोपेली देशमा फैलिएको भन्दै डेली मेलले समाचार लेखेको थियो । मन्त्रालयले उक्त समाचारको खण्डन गरेको हो ।
विश्व स्वास्थ्य संगठनले युके भेरियन्टलाई अल्फा र भारतीय भेरियन्टलाई डेल्टा नाम दिएको थियो । नेपालस्थित विश्व स्वास्थ्य संगठनले पनि अहिलेसम्म नेपाल भेरियन्ट फेला परेको भन्ने कुरामा विश्व स्वास्थ्य संगठनलाई अवगत नरहेको प्रष्ट पारेको छ । मन्त्रालयले यसको यर्थाथबारे बेलायतको स्वास्थ्य नियामक निकायलाई पत्र पठाइएको प्रवक्ता डा. पौडेलले जानकारी दिएका छन् ।
