काठमाण्डाै – नेपालमा पनि कोरोना भाइरसको ‘डबल म्युटेन्ट भेरिएन्ट’ भेटिएको छ।
इपिडिमियोलोजी तथा रोग नियन्त्रण महाशाखाका अनुसार देशमै पहिलोपटक कोरोनाको डबल म्युटेन्ट भेरएन्ट फेला परेको हो।
‘भारतमा पत्ता लागेको र भारतले भेरिएन्ट अफ कन्सर्न भनेर घोषणा नगरिसकेको डबल म्युटेन्ट भेरिएन्ट ललितपुरबाट संकलन गरिएको नमुनामा पुष्टि भएको छ,’ स्वास्थ्य मन्त्रालयको नियमित प्रेस ब्रिफिङमा बुधबार डा. पौडेलले भने, ‘पछिल्लो समयमा नेपालमा संक्रमणमा वृद्धि हुनुमा पनि बेलायतमा पत्ता लागेको भेरिएन्ट मुख्य रूपमा जिम्मेवार छ।’
उनका अनुसार एउटै भाइरस परिवर्तन भएर दुई स्वरूप देखापर्नु डबल म्युटेन्ट भेरिएन्ट हो। यो भेरिएन्ट तीव्र गतिले फैलिने तथा कडा संक्रमण गर्ने खालको हो। कोरोनाको यो नयाँ प्रजाति खासगरी स्कुले बालबालिका उल्लेख्य संख्यामा देखिएको पौडेलले बताए।
निर्देशक पौडेलका अनुसार शंका लागेर जिनोम सिक्वेन्सिङका लागि १५ वटा नमुना हङकङस्थित प्रयोगशालमा पठाइएको थियो। त्यस क्रममा एक जनामा डबल म्युटेन्ट भेरिएन्ट भेटिएको हो।
ललितपुरका ती व्यक्तिले एक महिनाअघि स्वाब संकलन गराएका थिए। हकङकबाट रिपोर्ट आउन ढिला हुँदा ती व्यक्ति अहिले सम्पर्कमा नरहेकाले तुरुन्त उनको कन्ट्याक्ट ट्रेसिङ थालिने उनले बताएका छन्।
डा. पौडेलकाअनुसार हङकङमा परीक्षण गरिएका नमुनामध्ये काठमाडौंका ४, भक्तपुरका २, कास्कीका २, नुवाकोटका १ जनामा ‘यूके भेरिएइन्ट’ (बेलायतमा देखापरेको नयाँ प्रजाति) पुष्टि भएको छ। ती व्यक्ति धेरैजसो २१ देखि ५९ वर्षसम्मका छन्। नमुना लिएकामध्ये दार्चुलाका एक जनामा भने नयाँ भेरिएन्ट पुष्टि नभएको उनले बताए।
नेपालमा पछिल्लो समय कोरोनाबाट हुने संक्रमण तथा मृत्युको दर ह्वात्तै बढेको छ। उता भारतमा केही दिनयता लगातार २४ घण्टामा लाखभन्दा बढीको संख्या संक्रमण पुष्टि भइरहेको छ। मृत्युको दर पनि बढेको छ।
