टोकियो – विश्वका कयौं यस्ता स्हथानहरु रहेका छन् जसका विशेष विशेषताका कारण बेला बेलामा चर्चामा आउने गर्दछन् । सुन्दा आश्चर्य लाग्न सक्छ, तर जापानको दक्षिण–पश्चिममा अवस्थित ओकिनोसिमा आइल्याण्डमा धार्मिक कारणले गर्दा आज पनि महिलाहरू जान पाउँदैनन् । साथसाथै त्यस आइल्याडमा जाने पुरुषहरुका लागि पनि कडा नियमहरु पालना गर्नुपर्ने हुन्छ ।
७ सय वर्गमिटरमा फैलिएको यस टापु चौथो देखि नवौं शताब्दीसम्म कोरियाली प्रायदीप र चीनबीच व्यापार गर्नका लागि प्रयोग गरिन्थ्यो । धार्मिकरुपमा यस टापुलाई एकदमै पवित्र मानिन्छ । पुरानो रितिरिवाज अनुसार चल्दै आएको धार्मिक प्रचलनका कारण महिलाहरुलाई अहिले पनि यस टापुमा जान प्रतिबन्ध गरिन्छ ।
प्रत्येक वर्षको मे २७ तारिकका दिन २ सय पुरुष मात्र यस पवित्र स्थलमा जाने गर्दछन् र त्यहाँ सन् १९०४–०५ को बिचमा रुसी–जापानी युद्धको समयमा समुद्रमा जीवन गुमाएकाहरुलाई श्रदाञ्जली दिने गर्दछन् । यस आइल्याण्डमा जान पुरुषहरु निर्वस्त्र नुहाई शुद्धीकरणका लागि केही विधिको पालन गर्नुपर्छ । यस्तै फर्किने बेलामा कुनै स्मरणयोग्य वस्तु ल्याउन पाइँदैन भने त्यहाँको बारेमा अरुलाई भन्न पनि नहुने नियम रहिआएको छ ।
समुद्रको यात्रा खतरानाक हुने र महिलाले आफ्ना बच्चाहरुको हेरविचार गर्नका लागि महिलालाई यस टापुमा जानका लागि नदिएको भनिए तापनि स्पष्ट कारण भने रहेको छैन ।
भनिन्छ, यस आइल्याण्डमा मुनाकाटा ताइसा ओकित्सुमिया श्राइन रहेको छ, जहाँ समुद्रको देवीको पुजा गर्ने गरिन्छ । भनिन्छ, यहाँ १७ औं शताब्दीमा जहाजहरुको सुरक्षाका लागि पुजा गर्ने गरिन्थ्यो ।
