विश्वकप छनोट : कुवेतसँग नेपाल पराजित

काठमाडौं – फिफा विश्वकप २०२२ तथा एएफसी एसियन कप २०२३ संयुक्त छनोट अन्तरगत खेलमा नेपाल कुवेतसँग पराजित भएको छ । भुटानको थिम्पुस्थित चामलिमिथाङ रंगशालामा भएको खेलमा नेपाल १-० गोल अन्तरले पराजित भएको हो ।

नेपालविरुद्ध कुवेतका कप्तान बादेर अल अलमोतावाले गोल गरे । नले खेलको २८ औं मिनेटमा गोल गर्दै पहिलो हाफमा टिमलाई अग्रता दिलाएका थिए । नेपाली खेलाडीले रक्षात्मक खेलेपनि गोल फर्काउन सकेनन् । कुवेतले दोस्रो हाफमा गोल गर्ने अवसर पाए पनि थप गोल गर्न सकेन ।

घरेलु दर्शकमाझ हुनुपर्ने खेल दशरथ रंगशाला तयार हुन नसक्दा भुटानमा खेलाइएको हो । नेपालले यसअघिभन्दा सुधारिएको प्रदर्शन गरेको थियो । यसअघि नेपाल अवे खेलमा कुवेतसँग ७-० गोलले पराजित भएको थियो । जितसँगै अंक तालिकामा कुवेत शीर्ष दोस्रो स्थानमा रहेको छ । पराजित नेपाल ३ अंकसहित अंक तालिकाको चौथो स्थानमा छ ।