काठमाडौं – नेपाल ओलम्पिक कमिटीको अध्यक्षमा पुनः जीवनराम श्रेष्ठ निर्वाचित भएका छन् । शनिबार काठमाडौंमा भएको विशेष साधारणसभाबाट श्रेष्ठ पुनः ओलम्पिक कमिटीको अध्यक्षमा निर्वाचित भएका हुन् ।
अध्यक्षमा निर्वाचित श्रेष्ठले १७ मत प्राप्त गर्दा उनका प्रतिस्पर्धी उमेशलाल श्रेष्ठले १० मतमात्रै प्राप्त गरेका थिए । यस्तै, कमिटीको उपाध्यक्षमा ज्योति राणा निर्वाचित भएका छन् । महासचिवमा भने निलेन्द्र श्रेष्ठ निर्वाचित भए । निलेन्द्रले १५ मत प्राप्त गर्दा उनका प्रतिस्पर्धी पुरेन्द्र लाखेले १२ मत पाए ।
यसैगरी, कमिटीको तीन सचिवमा दीपकहर्ष बज्राचार्य, तुलसी थापा र रामजीबहादुर श्रेष्ठ निर्वाचित भएका छन् । सचिवमा उम्मेदवारी दिएका राखेपका पूर्व सदस्यसचिव केशव विष्ट भने पराजित भए । निर्वाचनमा बज्राचार्यले २५, थापाले २१ र श्रेष्ठले १८ मत पाउँदा पराजित भएका विष्टले १७ मत पाएका थिए ।
