काठमाडाैं – स्टार फरवार्ड सावित्रा भण्डारीको निर्णायक गोल प्रेरित नेपाल पहिलो चरणको अन्तिम खेलमा ताजकिस्तानलाई १-० ले पराजित गर्दै नादेझ्दा कप महिला फुटबल प्रतियोगिताको फाइनलमा प्रवेश गरेकाे छ ।
किर्गिस्तानको काराकोल शहरस्थित सेन्ट्रल रंगशालामा निर्धारित ९० मिनेटको खेल सकिन ४ मिनेट बाँकी हुँदा गिता रानाले मैदानको लगभग मध्य भागबाट प्रहार गरेको फ्रि-किकलाई हेडरमार्फत गोलमा परिणत गर्दै सावित्राले नेपालको जित सुनिश्चित गरिन् । उज्वेकिस्ताविरुद्धको खेलमा घाइते भएकी कप्तान निरु थापाको अनुपस्थितिमा रेनुका नगरकोटीको नेतृत्वमा मैदानमा उत्रिएको नेपाली टोली खेलको तेस्रो मिनटमै गोल नजिक पुगेकाे थियो ।
तेस्रो मिनेटमै नेपाली फरवार्ड सावित्राले पेनाल्टी बक्स अगाडिबाट प्रहार गरेको फ्रि-किक विपक्षी टोलीको ‘क्रसबार’मा लागेर फर्केको थियो । निरन्तर प्रहास गरे पनि गोल हासिल गर्न नसकेपछि पहिलो हाफकाे खेल सकिन तीन मिनेट बाँकी रहँदा नेपाली टोलीका मुख्य प्रशिक्षक हरि खड्काले रक्षक हिरा कुमारी भूजेलको स्थानमा फरवार्ड रेखा पाैडेललाई परिवर्तन गरेका थिए । तर ६६औं मिनेटमा विपक्षी टोलीकी गोलकिपरसँग ठोक्किएर रेखा घाइते भएपछ उनको स्थानमा वेकल्पिक खेलाडी अनिता केसी मैदानमा उत्रिएकी थिइन्।
कप्तान निरुको स्थानमा प्रशिक्षक हरि खड्काले सरु लिम्बूलाई माैका दिएका थिए । आइतबार भएको पहिलो खेलमा किर्गिस्तानलाई ८-२ गोलको नतिजामा पराजित गरेको नेपाली टोली सोमबार ४४ औं बरियताको उज्वेकिस्तानसँग २-० ले स्तब्ध भएको थियो । उपाधिका लागि बिहीबार हुने फाइनलमा सोमबार नेपाललाई पराजित गर्दै एक खेल अगावै फाइनलमा प्रवेश गरिसकेकाे उज्वेकिस्तान र नेपाल पुन: आमनेसामने हुने भएका छन् ।
फाइनलमा फिफा बरियताको ४४औं स्थानमा रहेको उज्वेकिस्तानसँग पहिलो चरणको दोस्रो खेलमा पराजित भएको बदला लिने नेपालले सुनाैलो अवसर प्राप्त गरेको छ । १ सय १औं स्थानमा रहेको नेपाली महिला टोलीले उज्वेकिस्तानविरुद्ध यसअघिको भेटको नतिजा उल्ट्याउन सफल भए उत्कृष्ट लयसहित मंसिरमा हुने १३औं दक्षिण एसियाली खेलकुदमा सहभागी हुनेछ । राउन्ड रोबिन लिग पद्धतिमा जारी प्रतियोगिताको पहिलो चरणबाट शीर्ष दुई टोलीले फाइनलमा उपाधिका लागि प्रतिस्पर्धा गर्ने नियमअनुसार उज्वेकिस्तान र नेपालको भेट निश्चित भएको हो ।
आगामी मंसिरमा काठमाडौं र पोखरामा हुने १३औं दक्षिण एसियाली खेलकुदको तयारी स्वरुप नेपालले सहभागिता जनाएको प्रतियोगितामा आयोजक किर्गिस्तान, उज्वेकिस्तान र ताजकिस्तान सहभागी छन् । किर्गिस्तानविरुद्धको खेलमा ४ गोल र दुई गोलका लागि पास मिलाएकी सावित्राले आज गरेको निर्णायक गोलसँगै प्रतियोगितामा व्यक्तिगत गोलसंख्या छ पुर्याएकी छिन् ।
