काठमाडाैं – म्यानचेस्टर युनाइटेड र युभेन्टसले ठूलो सम्झौता गर्न लागेको अन्तर्राष्ट्रिय सञ्चारमाध्यमहरुले जनाएका छन् । यी दुई क्लब पाउलो डिबाला र रोमेलो लुकाकु एकआपसमा साटासाट गर्नेमा सहमतिनजिक पुगेका छन् ।
स्पोटर्सकिडाका अनुसार युभेन्टसले म्यानचेस्टर युनाइटेडसँग खेलाडी साटासाट गर्ने प्रस्ताव राखेको थियो । जसमा दुवै क्लब सहमतिनजिक पुगेको बताइएको छ । लुकाकुलाई म्यानचेस्टरले बेच्ने निर्णय गरेको थियो । लुकाकु युनाइटेडका महङ्गो खेलाडीमा पर्छन् । यता क्रिष्टियानो रोनाल्डोको छायाँमा परेका डिबालाले क्लब छाड्ने कुरा केही समयअघि मात्र चर्चामा आएको हो ।
डिबालाले सम्झौता स्वीकारेको खण्डमा दुई क्लबबीच खेलाडी साटासाट हुनेछ । म्यानचेस्टर युनाइटेडका व्यवस्थापक ओल गनर सोल्स्कजारले अर्जेन्टिना र बेल्जियमका स्टारबीच सम्झौता हुनेमा आफू आशावादी रहेको बताएका छन् । उनले भने, ‘हामी सम्झौताको लागि काम गरिरहेका छौँ । नयाँ लिग सुरु हुनका लागि १० दिनमात्र बाँकी छ र हामी दुई खेलाडीलाई सहमतिमा ल्याउन प्रयासरत छौं ।’
डिबालाले बिहीबारको खेलमा सहभागिता जनाउने र त्यसपछि मात्र उनको भबिष्यबारे सहमति गर्ने कुरा युभेन्टसका प्रशिक्षक माउरिजिओ सार्रीले बताएका छन् ।