काठमाडौं – चितवनमा हिजो साँझ आएको हावाहुरी र असिनाले करिब १५ विगाह क्षेत्रफलमा लगाइएको केरा खेतीमा ठूलो क्षती पुगेको छ ।
क्षतीको यकिन विवरण आइनसकेपनि केरा खेतीमा भएको यो नोक्सानी अहिलेसम्मकै ठुलो भएको हुनसक्ने केरा व्यवसायीहरुले दाबी गरेका छन् । चितवन केरा उत्पादक संघका अध्यक्ष विष्णुहरि पन्तले पुर्वी चितवनको पदमपुर, जुटपानी, पिठवा चैनपुर क्षेत्रमा १५ सय विघामा लगाइएको अधिकांश बोटहरु हावाहुरीले लडाएकाले ठूलो क्षती भएको हुनसक्ने बताउनुभयो ।
अध्यक्ष पन्तले भन्नुभयो, ‘पुर्वी चितवनको पदमपुर, जुटपानी, पिठवा चैनपुर क्षेत्रमा १५ सय विघामा केरा खेती छ । हिजो आइतबार साँझ आएको हावाहुरीले धेरै नै बोटहरु लडाएको छ ।
नलडेका बोटको पात र फल असिनाले चुटेर पुरै नोक्सान भएको छ ।’ किसानहरुले टिपाएको विवरण अनुसार १० करोड रुपैयाँ बढीको क्षती भएको हुनसक्ने पन्तले बताउनुभयो ।
पन्तले भन्नुभयो, ‘विवरणहरु संकलन भइरहेका छन् । त्यसैका आधारमा नोक्सान धेरै नै भएको सहजै अनुमान लगाउन सकिन्छ । आएका विवरण अनुसार पनि १० करोड रुपैयाँका हाराहारीमा क्षति भएको छ ।’ यसअघि गत साता मात्रै जुटपानीमा एक समुहले केराका ३१ सय बोट काटेर सखाप पारेका थिए ।
