काठमाडौं – हवाई इन्धनको मूल्य घटेसँगै निजी वायुसेवा कम्पनीले आन्तरिक हवाई भाडा घटाएका छन् । नेपाल आयल निगमले केही दिनअघि हवाई इन्धनको मूल्य घटाएपछि वायुसेवा सञ्चालक सङ्घले हवाई भाडा दर घटाएको हो ।
निगमले हवाई इन्धनको मूल्य घटाएकाले आन्तरिक भाडादर केही समायोजन गरिएको सङ्घका प्रवक्ता घनश्याम आचार्यले राससलाई जानकारी दिनुभयो । निगमले हवाई इन्धनको मूल्य प्रतिलिटर चार घटाएर ८२ बनाएको थियो । यही असार २१ गते भोलिदेखि लागू हुनेगरी हवाई भाडादर घटाइएको बुद्धएयरका बजार व्यवस्थापक विनिता थापाले जानकारी दिनुभयो ।
नयाँ भाडादरअनुसार अब काठमाडौँबाट विराटनगर जाँदा सात हजार १०४ तिर्नुपर्छ । यसअघि विराटनगरको भाडा सात हजार २०० थियो । त्यस्तै भद्रपुरको भाडा आठ हजार ६७६, भैरहवाको पाँच हजार ९१३, धनगढीको १२ हजार १९ र नेपालगन्जको आठ हजार ३६५ पर्छ । यसअघि भद्रपुरको आठ हजार ७००, भैरहवाको छ हजार, धनगढीको १२ हजार २०० र नेपालगन्जको नौ हजार ५०० थियो ।
त्यसैगरी पोखरा जान पहिला चार हजार ७०० तिर्नुपथ्यो भने अब चार हजार ६३४ लाग्ने भएको छ । काठमाडौँबाट जनकपुर जान तीन हजार ९४८ लाग्नेछ । पहिला यही रुटमा चार हजार लाग्थ्यो । सबैभन्दा कम दूरीको उडान रहेको सिमरा जाने भाडामा भने ४० मात्र घटेको छ । सिमरा जान पहिला तीन हजार ४५ लाग्थ्यो भने अब तीन हजार पाँच तिरे पुग्छ । भरतपुर जान तीन हजार ३५३ लाग्छ । पहिला रु तीन हजार ५०० थियो ।
तुम्लिङ्टारको भाडा पाँच हजार ७०० बाट घटाएर पाँच हजार ६२३ कायम गरिएको छ । माउन्टेन फ्लाइटको भाडामा पनि ११ हजारबाट घटाएर रु १० हजार ८६२ कायम गरिएको छ ।
