काठमाडौं – काठमाडौं स्थित स्युचाटारमा रहेको नेपाल विद्युत प्राधिकरणको सवस्टेशनमा भीषण आगलागी भएपछि देशभरको विद्युत अवरुद्ध भएको छ ।
सवस्टेशनमा आगलागी भएपछि अहिले नेपालमा भारतबाट आयात गरिरहेको मात्रै विद्युत प्रवाह भइरहेको छ ।
अहिले भारतबाट ल्याएर बाँडिएको स्थानमा मात्रै बिजुली छ’, सवस्टेशनका इन्जिनियिर विनोद लोहनीले भने, ‘नेपालमै उत्पादन गरेर बाँडिएको विजुली भने यही सवस्टेशनमा लागेको आगोका कारण पूर्ण रुपमा अवरुद्ध छ।’
आगो निभाउन काठमाडौं महानगरपालिकाको दमकल र पानीका ट्यांकरहरु प्रयोग गरिएका थिए । लामो समयसम्म आगो नियन्त्रणमा आउने सकेन । विद्युत सर्ट भएर सुरु भएको आगलागीबाट १३२/६६ केभी प्रसारणलाइनका लागि जडान गरिएको एउटा ट्रान्सफर्मर जलेर पूर्णरुपमा क्षतिग्रस्त भएको छ । त्यसैगरी अन्य ट्रान्सफर्मरमा पनि क्षति पुगेको छ भने सवस्टेशनका अन्य विद्युतीय संरचना पनि जलेका छन् । क्षतिको पूर्ण विवरण आउन बाँकी छ ।
