चितवन – चितवनको भरतपुरमा भएको सवारी दुर्घटनामा पाँच जना घाइते भएका छन् । घाइतेमध्ये एकै परिवारका तीन जनाको अवस्था गम्भीर रहेको जिल्ला प्रहरी कार्यालय चितवनले जनाएको छ ।
सोमबार साँझ भरतपुर–१० स्थित ओरालोमा नारायणगढ जाँदै गरेको ग १ ज ५७०६ नम्बरको पिकअप भ्यानले दुईवटा मोटरसाइकललाई ठक्कर दिँदा उक्त दुर्घटना भएको हो ।
पिकअप भ्यानले विपरीत दिशातर्फ जाँदै गरेको ग ४ प ३९१८ नम्बरको मोटरसाइकल र ना १७ प ५७२१ नम्बरको स्कुटरलाई ठक्कर दिँदा उनीहरु घाइते भएका हुन् ।
घाइते हुनेमा ३९१८ नम्बरको मोटरसाइकल चालक भरतपुर १२ का ५० वर्षीय श्रीराम कट्टेल, उनकी श्रीमती ४५ वर्षकी नारायणी कट्टेल र छोरी सन्ध्या कट्टेल रहेका छन् । एउटै मोटरसाइकलमा रहेका तीनै जनाको अवस्था गम्भीर रहेको प्रहरीले जनाएको छ ।
यस्तै, स्कुटीमा सवार भरतपुरका स्थानीय १८ वर्षका विजय न्यौपाने र भरतपुर–७ का २० वर्षीय सुमाङ्कर भण्डारीसमेत घाइते भएको प्रहरीले जनाएको छ ।
उनीहरु पाँचैजनाको अहिले चितवन मेडिकल कलेजमा उपचार भइरहेको र पिकअप भ्यानका चालकलाई नियन्त्रणमा लिइएको प्रहरीले जनाएको छ ।
