काठमाडौं- माधवकुमार नेपाल नेतृत्वको सरकारका गृहराज्यमन्त्री रिजवान अन्सारी जतिबेला चर्चित भए, त्यतिबेला उनले राजीनामा दिएका थिए ।तत्कालिन गृहमन्त्री भीम रावलले जिम्मेवारी नदिएको भन्दै राजीनामा दिएको अन्सारीजस्तै चर्चा कमाउन केही मधेसी दलका तर्फबाट राज्यमन्त्रीहरुले सुर कसेका छन् । अहिले गुनासो सुनाउन मन्त्रालय जाने जनतासँग राज्यमन्त्रीहरुले उल्टै आफूले जिम्मेवारी नपाएको भन्दै गुनासो थुपारेर पठाउने गरेका छन् ।
कृषि राज्यमन्त्री ओमप्रकाश यादव ‘गुल्जारी’, सञ्चार राज्यमन्त्री सुरिताकुमारी साह, स्वास्थ्य राज्यमन्त्री सरोजकुमार यादवले आफूलाई जिम्मेवारी नदिए पद छाड्ने चेतावनी दिएका छन् ।
स्वास्थ्य राज्यमन्त्री सरोजकुमार यादव भन्छन्- ‘शाखा अधिकृतले पनि नटेर्ने मन्त्री भएर बस्नुको अर्थ छैन ।’ एक राज्यमन्त्रीले नाम नछाप्ने शर्तमा भने- ‘हामी त मन्त्रीको पीएजत्तिको हैसियतमा पनि छैनौं, गुनासो सुनाउन आएमा मन्त्री भेटिँदैनन्, हामी गुनासो सुन्ने र मन्त्रीलाई भनिदिउँला भन्नेमात्र छौं ।’
