काठमाडौ – कुटनीतिक राहदानी दुरुपयोगको अभियोगमा फरार रहेका सभासद नारदमुनी रानाले तलब भत्ताको माग गर्दै संसद सचिबालयमा मञ्जुरीनामा सहित अर्को ब्यक्तिलाई पठाएका छन् । उनले कैलाली गेटा घर भई काठमाडौं बस्ने लिलाधर सापकोटाका छोरा जयराम सापकोटालाई मसिंर २६ गते मञ्जुरीनामा दिएका छन् ।रानाको मञ्जुरीनामा लिएर पारिश्रामिक लिन पुगेका सापकोटालाई संसद सचिबालयले ब्यक्ति स्वयम् उपस्थित हुनुपर्ने भन्दै फिर्ता गरिदिएको छ ।
गत साउनमा राहदानी दुरुपयोगको अभियोगमा अख्तियार दुरुपयोग अनुसन्धान आयोगले पक्राउ गरेर मुद्दा लगाउने तयारी गर्दा गर्दै राना जिल्ला अदालत काठमाडौंबाट प्रहरीको आँखा छलेर फरार भएका थिए । त्यसपछि अख्तियारले राना बिरुद्ध मुद्दा दायर गर्न सकेको छैन ।
प्रहरीको केन्द्रीय अनुसन्धान ब्युरोले राहदानी दुरुपयोग गरेको अभियोगमा रानालाई गत असारमा पक्राउ गरेको थियो । राहदानी ऐन २०२४ को दफा ५ को कसुर अन्तर्गत अनुसन्धान गरेर जिल्ला अदालतमा मुद्दा दायर गरेको थियो । अदालतले त्यहि दिन उनलाई ९ हजार ५ सय रुपैंया धरौटीमा छाड्ने आदेश दिएपछि उनी प्रहरीको आँखा छल्दै भागेका थिए । त्यसपछि प्रहरी हात धोएर उनको पछि परेको थियो ।
अख्तियारले मुद्दा चलाएपछि सभासद पद स्वत निलम्बन हुने प्रावधान छ । तर यो मुद्दा अघि नबढेपछि उनी फरार रहेपनि सभासद् पद निलम्बन भएको छैन । राहदानी दुरुपयोगको अभियोग लागेका सभासद राना कानुनी रुपमा सभासद कै हैसियतमा छन् ।
एमालेबाट समानुपातिक तर्फका संविधानसभा सदस्य राना कैलालीका हुन् । उनले सभासद भएपछि बिभिन्न फरक फरक मितिमा परराष्ट्रबाट दुई वटा कुटनीतिक राहदानी लिएका छन् । उनले सन् २००८ अगष्टमा ०१९९१७ नम्बरको राहदानी लिएका छन् । त्यसलाई २००९ सेप्टेम्बरमा त्यसलाई नबिकरण गराएका छन् । यस्तै सन् २०१० अक्टोबरमा ०२१२४४ नम्बरको अर्को कुटनीतिक राहदानी लिएका छन् ।
