टोकियो – यो बर्षदेखि राष्ट्रिय पर्वको मान्यता पाएको परम्परागत माघे संक्रान्ति आज मुलुकभित्र र बाहिर हर्षोल्लाससका साथ मनाईदैं छ ।
नेपाली समुदायमा माघेसंक्रान्ति पर्वका बेला घिउ, चाकु र तरुललगायतका परिकार खाने चलन छ ।
यस अवसरमा चितवनको देवघाट, सुनसरीको बराहक्षेत्र, नुवाकोटको देवीघाट, बर्दियाको ठाकुरद्वारलगायतका स्थानमा स्नान गर्नेहरुको बिहानैदेखि घुइँचो लागेको छ । गएरातीदेखि नै देवघाटमा भक्तजनहरुको भीड लागेको र भीडका कारण ट्रकबाट खसेर १ जना अधबैशै महिलाको ज्यान गएको कालिका एफएमले जनाएको छ ।
थारु, मगर र छन्त्याल समुदायमा माघेसंक्रान्तिलाई नयाँ वर्षको रुपमा पनि मनाइने चलन छ । पारिवारिक सदस्य, आफन्त तथा साथीभाई सँगै बसेर तरुल, चाकु, लड्डु, घिउलगायतका मीठामीठा परिकार खाने र रमाईलो गर्ने यो पर्वलाई नेपाल सरकारले यो बर्षदेखि सार्बजनिक बिदा दिने निर्णय गरेको छ । माघी पर्वको अवसरमा राजधानीको टुँडिखेलमा थारु महोत्सवको आयोजना गरिएको छ ।
माघे संक्रान्तिका दिनदेखि सूर्य धनु राशीबाट मकर राशीमा प्रवेश गर्ने भएकाले माघे संक्रान्तिलाई मकर संक्रान्ति पनि भन्ने चलन छ ।
यसैबीच माघे संक्रान्तिको अवसरमा राष्ट्रपति डा. रामवरण यादव र प्रधानमन्त्री डा. बाबुराम भट्टराईले सबै नेपालीमा सुख, शान्ति र समृद्धिको कामना गर्नुभएको छ ।
यसैबिच नेपाल मगर सेवा समिति जापानले मगर समुदायको महत्वपूर्ण पर्व माघे संक्रान्तिको अवसरमा आज साँझ टोकियोको इकेबुकुरोस्थित बुद्ध रेष्टुरेन्टमा रात्रीभोजसहितको भेटघाट तथा शुभकामना आदान-प्रदान कार्यक्रमको आयोजना गरेको थाहा भएको छ । ***
