काठमाडौं– गैर आवासीय नेपालीहरुको अन्तर्राष्ट्रिय साझा संस्था गैर आवासीय नेपाली संघको अन्तर्राष्ट्रिय समन्वय परिषदको पाँचौं विश्व सम्मेलनमा यसपटक अमेरिकी कंग्रेसम्यान उम्मेदवार दर्शन रौनियार चर्चामा रहे ।प्रधानमन्त्री डा. बाबुराम भट्टराईसहित ठूला दलका शीर्ष नेतादेखि एनआरएनहरु पनि उनीप्रति कुरा गर्न लालायित देखिन्थे । सम्मेलनमा उनले बुधबार सम्वोधन गर्दै नेपालका लागि एनआरएनले सकेजति गर्नुपर्नेमा जोड दिएका थिए ।
सम्मेलनअवधिभर सोल्टि होटल तथा राजधानीका अन्य कार्यक्रममा उनी सहभागी भए । यसक्रममा उनले राजधानीका ज्यापु समाजले गरेका कार्यक्रम र माइती नेपालको कार्यक्रममा भाग लिए ।
१८ वर्षअघि अमेरिका गएका उनी दसैंमा आमाका आर्शिवाद थाप्न र सम्मेलनमा भाग लिन काठमाडौं आएका थिए । उनी यसैसाता अमेरिका फर्कँदैछन् ।
नेपालका साना ठूला संचारमाध्यमले पनि उनको समाचारलाई प्राथमिकता दिएका छन् । ‘यहाँ आएपछि मलाई बधाई दिने धेरै भेटिनुभयो,’ सोल्टि होटलमा समुद्रपारिसितको संक्षिप्त भेटमा उनले भने, ‘भ्याएसम्मका सवै कार्यक्रम र निम्तोलाई स्वीकार गरिरहेको छु ।’
