टोकियो – सन् २०२४ को अन्त्यसम्म जापानमा बसोबास गर्ने विदेशी नागरिकहरूको संख्या ३७ लाख नाघेको छ, जुन अघिल्लो वर्षको तुलनामा १० दशमलव ५ प्रतिशतले वृद्धि भएको हो ।
सरकारले सार्वजनिक गरेको तथ्यांकअनुसार जापानमा बस्ने विदेशीहरूको संख्या नयाँ कीर्तिमानमा पुगेको छ । शरणार्थी हैसियत पाउने व्यक्तिहरूको संख्या १ सय १३ ले घटेर १ सय ९० मा पुगेको छ । तर, ‘पूरक संरक्षणू कार्यक्रमअन्तर्गत मुख्यतः युक्रेनी नागरिकहरूसहित १ हजार ६ सय ६१ जनालाई बसोबासको अनुमति दिइएको छ । यो नयाँ प्रणालीले युद्धबाट प्रभावित व्यक्तिहरूलाई शरणार्थी हैसियत प्राप्त गर्नेहरूसँग मिल्दोजुल्दो रूपमा दीर्घकालीन बसोबास भिसा दिने व्यवस्था गरेको छ ।
डिसेम्बर २०२४ सम्म जापानमा बसोबास गर्ने ३७ लाख ६८ हजार ९ सय ७७ विदेशी नागरिकहरूमध्ये स्थायी बसोबास गर्नेहरूको संख्या करिब ९ लाख १८ हजार पुगेको छ, जुन ३ प्रतिशतको वृद्धि हो । जापानको ‘प्राविधिक इन्टर्नशिप कार्यक्रम’ अन्तर्गत रहने विदेशीहरूको संख्या १२ दशमलव ९ प्रतिशतले बढेर करिब ४ लाख ५६ हजार पुगेको छ । यो कार्यक्रम विकासोन्मुख राष्ट्रहरूमा सीप हस्तान्तरण गर्ने उद्देश्यले ल्याइएको हो ।
राष्ट्रियताको आधारमा हेर्दा, चिनियाँ नागरिकहरूको संख्या सबैभन्दा धेरै अर्थात् ८ लाख ७३ हजार रहेको छ । दोस्रो स्थानमा भियतनामी नागरिकहरू ६ लाख ३४ हजार र तेस्रो स्थानमा दक्षिण कोरियाली नागरिकहरू ४ लाख ९ हजार रहेका छन् । शरणार्थी दर्जाका लागि आवेदन दिने व्यक्तिहरूको संख्या १० दशमलव ५ प्रतिशतले घटेर करिब १२ हजारमा झरेको छ ।
