काठमाडौं – चालु आर्थिक वर्ष २०८१/८२ को दोस्रो चौमासिकसम्म सरकारी खर्च आम्दानीभन्दा उल्लेख्य रूपमा बढी देखिएको छ । महालेखा नियन्त्रक कार्यालयको तथ्याङ्कअनुसार गत फागुन मसान्तसम्म सरकारको कुल आम्दानी ७ खर्ब ३८ अर्ब ८२ करोड १३ लाख पुगेको छ, भने सोही अवधिमा सरकारको खर्च ८ खर्ब ३९ अर्ब ३५ करोड ६० लाख पुगेको छ ।
यसरी हेर्दा चालु आर्थिक वर्षको दोस्रो चौमासिकसम्म सरकारको आम्दानीभन्दा खर्च १ खर्ब ५३ करोड ४७ लाखले बढी भएको देखिन्छ । सरकारको विकास खर्च भने अपेक्षाकृत रुपमा निकै कमजोर देखिएको छ । फागुन मसान्तसम्म पुँजीगत खर्च कुल विनियोजनको मात्र २३.३७ प्रतिशत भएको छ । चालु वर्षका लागि पुँजीगत शीर्षकमा विनियोजन गरिएको ३ खर्ब ५२ अर्ब ३५ करोड ४० लाखमध्ये हालसम्म मात्र ८२ अर्ब ३३ करोड ६० लाख खर्च भएको छ ।
चालु आर्थिक वर्षमा सरकारले कुल १८ खर्ब ६० अर्ब ३० करोड ३० लाखको बजेट विनियोजन गरेको थियो । तर, फागुन मसान्तसम्म वार्षिक बजेटको ४५.१२ प्रतिशत अर्थात् ८ खर्ब ३९ अर्ब ३५ करोड ६० लाख खर्च भइसकेको छ ।
- चालु खर्च: विनियोजित ११ खर्ब ४० अर्ब ६६ करोड ४५ लाखमध्ये हालसम्म ५१.२१ प्रतिशत अर्थात् ५ खर्ब ८४ अर्ब १२ करोड ७८ लाख खर्च भएको छ ।
- वित्तीय व्यवस्थापन खर्च: विनियोजित ३ खर्ब ६७ अर्ब २८ करोड ४५ लाखमध्ये हालसम्म ४७.०७ प्रतिशत अर्थात् १ खर्ब ७२ अर्ब ८९ करोड २२ लाख खर्च भइसकेको छ ।
सरकारले चालु आर्थिक वर्षका लागि कुल १४ खर्ब ७१ अर्ब ६२ करोड ९५ लाख राजस्व उठाउने लक्ष्य राखेको थियो । फागुन मसान्तसम्म सो लक्ष्यको ५०.२ प्रतिशत मात्र अर्थात् ७ खर्ब ३८ अर्ब ८२ करोड १३ लाख संकलन भएको छ ।
- कर राजस्व: कुल लक्ष्य १२ खर्ब ८४ अर्ब २० करोड ९६ लाखमध्ये हालसम्म ४९.७४ प्रतिशत अर्थात्रू६ खर्ब ३८ अर्ब ७९ करोड ९० लाख मात्र संकलन भएको छ ।
- गैरकर राजस्व: कुल लक्ष्य १ खर्ब ३५ अर्ब ९ करोड ३४ लाख रहेकामा हालसम्म ६०.३६ प्रतिशत अर्थात् ८१ अर्ब ५४ करोड ७७ लाख उठाइएको छ।
- वैदेशिक अनुदान: सरकारको वैदेशिक अनुदान सङ्कलन निकै कमजोर देखिएको छ । चालु वर्षका लागि ५२ अर्ब ३२ करोड ६५ लाख अनुदान लिने लक्ष्य रहेकामा हालसम्म मात्र १७.५१ प्रतिशत अर्थात् ९ अर्ब १६ करोड २५ लाख मात्र प्राप्त भएको छ ।
