अमेरिकाको विस्कन्सिनमा एक अनौठो घटना सार्वजनिक भएको छ, जहाँ ४ वर्षीय बालकले आइसक्रिम नपाएपछि आपतकालीन नम्बर ९११ मा फोन गरी आफ्नी आमालाई नै पक्राउ गर्न आग्रह गरे ।
घटनाक्रम अनुसार, ती बालकले मंगलबार प्रहरीलाई फोन गरी आमालाई “धेरै खराब” भन्दै उनीमाथि कारबाही गर्नुपर्ने बताए । प्रहरी अधिकारीहरूले घटनाको गम्भीरता बुझ्न सोधपुछ गर्दा बालकले आफ्नो आइसक्रिम आमाले खाइदिएको कारण आमालाई गिरफ्तार गर्नुपर्ने जिद्दी गरे । आमा छेउमै रहेकोले उनले फोन समातेर वास्तविकता खुलाइन् । उनले छोराले आइसक्रिम नपाएपछि रिसले प्रहरी बोलाएको बताइन् ।
यद्यपि, प्रोटोकलअनुसार प्रहरी अधिकारीहरू घटनास्थलमा पुगे । त्यहाँ पुगेपछि बालकले आफ्नो आक्रोश पोख्दै प्रहरी समक्ष फेरि आमालाई जेल लैजान अनुरोध गरे । तर, केहीबेर छलफलपछि उनले प्रहरीलाई आफूलाई आइसक्रिम नै चाहिएको मुख्य कारण बताए ।
यो घटनापछि दुई दिनमै प्रहरीले ती बालकको घरमा गएर उनलाई उपहारस्वरूप आइसक्रिम प्रदान गरे । सामाजिक सञ्जालमा भाइरल बनेको यो घटनाले प्रहरीको संवेदनशीलता र बालबालिकाको निष्कपट मनोविज्ञानलाई झल्काएको छ ।
