समाचार सुन्नुहोस :
काठमाडौँ – अमेरिकी राष्ट्रपति डोनाल्ड ट्रम्पले युरोपेली युनियनबाट आयात हुने रक्सीमा २०० प्रतिशत कर लगाउने चेतावनी दिएका छन्। युरोपेली मुलुकहरूले अमेरिकी रक्सीमा ५० प्रतिशत कर लगाउने योजना बनाएपछि ट्रम्पले यस्तो प्रतिक्रिया दिएका हुन्।
ट्रम्पले अहिले अमेरिकाको व्यापार नीतिमा ध्यान केन्द्रित गर्दै आयातित सामानमा कर बढाउने र घरेलू कर घटाउने योजना अगाडि सारेका छन्। उनले अमेरिकाको आर्थिक समृद्धिलाई मुख्य उद्देश्य बनाएर यी कदमहरू चाल्ने बताएका छन्। यसैबीच, ट्रम्पको यो नीतिलाई पहिलो विश्व युद्ध अघिको व्यापार नीतिसँग तुलना गरिएको छ। त्यसबेला आयात शुल्कले नै देशको आम्दानीको आधा भन्दा बढी हिस्सा ओगटेको थियो।
सन् १९१२ मा राष्ट्रपति विड्रो विल्सनले थियोडर रुजवेल्टलाई पराजित गरेपछि आयात शुल्कको सट्टा आम्दानी करलाई प्राथमिकता दिँदै नयाँ आर्थिक नीति ल्याएका थिए। ट्रम्पको कर वृद्धिको नीतिलाई धेरैले आलोचना गरे पनि, उनले यसले अरबौं डलरको राजस्व सिर्जना गर्ने दाबी गरेका छन्। यसले अमेरिकाको आर्थिक स्थितिमा ठूलो प्रभाव पार्न सक्ने उनको विश्वास छ।
