समाचार सुन्नुहोस :
काठमाडौँ – दक्षिण कोरियामा राष्ट्रपति युन सुक-योलको कदमको विरोध र विवादबीच प्रहरीले बुधबार राष्ट्रपति कार्यालय र सुरक्षा प्रदान गर्ने प्रहरी मुख्यालयमा छापा मारेको छ। यो जानकारी दक्षिण कोरियाली समाचार संस्था योनहापले सार्वजनिक गरेको हो।
सियोल महानगरीय प्रहरी र राष्ट्रिय सभा प्रहरी गार्डको कार्यालयमा पनि छापा मारिएको जनाइएको छ। यो कारबाही राष्ट्रपति युनद्वारा मार्शल ल लागू गरेपछि सुरु गरिएको अनुसन्धानको हिस्सा भएको बताइन्छ।
योनहापका अनुसार छापामार्ने समयमा राष्ट्रपति युन आफ्नो कार्यालयमा उपस्थित थिएनन्। गत हप्ता मंगलबार र बुधबारको बीचमा उनले देशभर मार्शल ल लागू गरेका थिए, तर चर्को विरोधपछि ६ घण्टाभित्रै उक्त निर्णय फिर्ता लिएका थिए।
यो विवादास्पद कदमपछि देशभर युनको विरोध बढेको छ। उनको निर्णय र त्यसपछि भएको छानबिनले दक्षिण कोरियाली राजनीतिक वातावरणलाई थप तनावपूर्ण बनाएको छ।
