समाचार सुन्नुहोस :
काठमाडौँ – अमेरिकाका नवनिर्वाचित राष्ट्रपति डोनाल्ड ट्रम्प र उत्तर एटलान्टिक सन्धि सङ्गठन (नेटो) का प्रमुख मार्क रूटबीच फ्लोरिडामा ‘नेटो गठबन्धनले सामना गरिरहेको विश्वव्यापी सुरक्षा मुद्दा’ बारे छलफल भएको छ । पाम बिचमा भएको बैठकमा विश्वव्यापी सुरक्षा चुनौती र नेटो गठबन्धनको भूमिकाबारे व्यापक छलफल भएको नेटोले जारी गरेको विज्ञप्तिमा भनिएको छ।
राष्ट्रपति पदको पहिलो कार्यकालमा ट्रम्पले युरोपलाई रक्षा खर्च बढाउन आक्रामक दबाब दिएका थिए र नेटोको भूमिकामा प्रश्न उठाएका थिए। यसपटकको चुनावी विजयपछि युरोपका नेताहरूले युक्रेनको सैन्य सहयोगमा कटौती हुने सम्भावनालाई लिएर चासो व्यक्त गरेका छन्। पूर्व नेदरल्यान्ड्सका प्रधानमन्त्री रूटले नोभेम्बर ५ मा ट्रम्पको विजयपछि उत्तर कोरिया र रुसको सम्बन्ध गहिरिने जोखिमबारे चर्चा गर्नुपर्ने आवश्यकता व्यक्त गरेका थिए।
नेटोका साझेदारहरूले रूसविरुद्ध युक्रेनलाई सहयोग जारी राख्नु अमेरिकी र युरोपेली सुरक्षाका लागि महत्त्वपूर्ण भएको बताएका छन्। ट्रम्पको विजयी पुनरागमनले यो सहयोगमा कुनै अवरोध आउँछ कि भन्ने शंका उत्पन्न गरेको छ। यो बैठक ट्रम्पको विदेश नीतिका प्राथमिकता र नेटो–अमेरिका साझेदारीको भावी दिशा प्रस्ट्याउन महत्त्वपूर्ण मानिएको छ।
