काठमाडौं – निजी क्षेत्रको अग्रणी वायु सेवा प्रदायक बुद्ध एयरले ७० हजार उडान साइकल पूरा गरेपछि मंगलबारदेखि एउटा नाइन एन एआईएन कलसाइनको एटीआर ४२ जहाजलाई विधिपूर्वक बिदा गरेको छ । उडान साइकल सकिए पछि कम्पनीले १८ लाख यात्रु बोकेको यो जहाजको औपचारिक रूपमा बिदाइ गरेको हो ।
उडानमा एउटा टेकअफ र एउटा ल्यान्डिङलाई एक साइकल मानिन्छ । सन् २००८ सेप्टेम्बर १७ मा माउन्टेन फ्लाइटबाट व्यावसायिक उडान सुरु गरेको उक्त जहाजले मंगलबार अन्तिम माउन्टेन फ्लाइट गरेको थियो ।१६ वर्षको सेवापछि सो जहाज उडाउन बन्द गरेर ह्याङ्गरमा राखिएको छ । उक्त जहाजलाई बुद्ध एयरका कर्मचारीहरूले त्रिभुवन अन्तर्राष्ट्रिय विमानस्थलमा वाटर स्यालुटसहित बिदाइ गरेका थिए।
उक्त जहाज कम्पनीले नै ४० हजार घण्टा उडाएको छ भने नेपाल आउनुअघि नै यसले ३० हजार घण्टा उडान गरिसकेको थियो । यो जहाजको कति पार्टपुर्जा काम लाग्छन् त्यसलाई निकाल्ने, जहाजको बडी निकाल्ने र काम लाग्नेलाई प्रयोग गर्ने र नलाग्नेलाई स्क्राप गर्ने कम्पनीले बताएको छ । कम्पनीका अनुसार जहाजको आयु सकिएकोले अब यसलाई विस्थापित गरिएको हो ।विमान निर्माता कम्पनीले तोकेको साइकलभन्दा १ अतिरिक्त उडान पनि गर्न पाइँदैन ।
कम्पनीले सन् २००८ मा अन्तर्राष्ट्रिय वित्त निगम(आईएफसी) को ऋण सहयोगमा दुई वटा एटीआर–४२–३२० जहाज नेपाल ल्याएको थियो । उसले आईएफसीकै ऋण सहयोगमा ह्यांगरको निर्माण पनि थालेको थियो । विगत १६ वर्षको अवधिमा कम्पनीले १९ वटा एटीआर जहाजहरू ल्याएर घरेलु बजारमा उडान गरिरहेको छ । कम्पनी एटीआर अपरेटरतर्फ संसारकै सातौं ठूलो एयरलाइन्स कम्पनी बनेको छ।
कम्पनीले १६ वर्ष ३ दिने उडानका क्रममा उक्त जहाजले १८ लाखभन्दा बढी यात्रुलाई सेवा प्रदान गरेको कम्पनीको भनाइ छ ।कम्पनीका कार्यकारी अध्यक्ष वीरेन्द्र बहादुर बस्नेतले जहाजलाई बिदा गर्ने क्रममा एटीआर विमानहरूको मर्मतसम्भार र उडान सञ्चालनमा बुद्ध एयरको टेक्निकल तथा अपरेसन टिम विकसित राष्ट्रकोभन्दा कम नरहेको बरु अब्बल रहेको बताए ।
कार्यक्रममा नागरिक उड्डयन प्राधिकरणका प्रतिनिधि, विभिन्न बैंकका उच्च अधिकृतहरूको पनि उपस्थिति थियो । कम्पनीले हाल दैनिक १५० भन्दा बढी उडानमार्फत दशौं हजार यात्रुलाई सेवा प्रदान गरिरहेको बताएको छ ।
कम्पनीले घरेलु उडानतर्फ पोखराबाट नेपालगन्ज, भैरहवा तथा चितवनको पनि सिधा उडान गरिरहेको छ भने धनगढी तथा सुर्खेतमा पनि उडान संख्या वृद्धि गरेको छ । यसैगरी, अन्तर्राष्ट्रिय उठानतर्फ भने कम्पनीले साताको ३ दिन भारतको वाराणसी उडान गर्दै आएको छ ।
