काठमाडौं – पोखरा महानगरपालिकाले जापानको होकुतो सहरसँग पर्वतीय नगरको मित्रता गाँसेको छ । विकास साझेदारी र जनसम्बन्धको आयामलाई प्रभावकारी बनाउन मित्रता गाँसेका हुन् ।
मित्रता सम्बन्धी सम्झौतामा पोखरा महानगरपालिकाका मेयर धनराज आचार्य र जापानको यामानासी प्रिफेक्चरस्थित होकुतो नगरका प्रमुख एइजी उएमुराले हस्ताक्षर गरेका छन् । मैत्रीपूर्ण सम्बन्ध, पारस्परिक विश्वास र सम्मानको आधारमा पर्वतीय नगर मित्रता कायम गरिएको पोखरा महानगरपालिकाका मेयर आचार्यले बताए ।
दुई सहरबीच विकास साझेदारी हुने उनको भनाइ थियो । ‘होकुतो नगरसँग हामीले नयाँ सम्बन्धको सुरुवात गरेका छौँ। यसले पोखरा जस्तै हिमालको काखमा रहेको होकुतोसँग पर्वतीय संस्कृति, रहनसहन र समग्र पर्यटन विकासका असल अभ्यासको आदानप्रदानमा महत्त्वपूर्ण योगदान पुग्नेछ,’ आचार्यले भने ।
प्राकृतिक, सांस्कृतिक र साहसिक पर्यटनको संगम पोखरा र होकुतोबीच कायम गरिएको मित्रताले दुवै सहरको पर्वतीय पर्यटन प्रवद्र्धनमा भूमिका खेल्नेमा उनी विश्वस्त छन् । सांस्कृतिक अनुभव, ज्ञान सीप र प्रविधिको आदान प्रदानलाई महत्वका साथ अगाडी बढाउन समझदारी भएको होकुतोका प्रमुख उएमुराले बताए ।
ह्स्ताक्षर समारोहमा जापानबाट यामानासी प्रिफेक्चरका सभामुख मासाहितो उजुकी, सांसद फुजिमोतो योसिहिको, नेपाल जापान फ्रेन्डिसिप एसोसिएसनका हिरोमी इसिकावा लगायत उपस्थित थिए । पोखरा महानगरपालिकाले हालसम्म विदेशका १३ र देशभित्रमा २ वटा नगरसँग मितेरी सम्बन्ध गाँसेको छ ।
