समाचार सुन्नुहोस :
काठमाडौँ – एसीसी वुमन्स एसिया कप-२०२४ अन्तर्गत आज नेपालले उपाधि दाबेदार भारतसँग प्रतिस्पर्धा गर्नेछ। नेपालको समूह चरणमा यो अन्तिम खेल हुनेछ। यसअघि नेपालले यूएईलाई ६ विकेटले पराजित गरेको थियो भने पाकिस्तानसँग ९ विकेटले पराजित भएको थियो।
सेमिफाइनलमा पुग्नका लागि नेपालले आजको खेल जित्नै पर्नेछ। आजै पाकिस्तानले पनि यूएईसँग समूह चरणको अन्तिम खेल खेल्नेछ। यी दुई खेलपछि सेमिफाइनलमा पुग्ने टोलीको टुंगो लाग्नेछ।
यदि पाकिस्तानले यूएईलाई पराजित गर्छ भने, नेपालले सेमिफाइनलमा पुग्न भारतलाई हराउनै पर्ने हुन्छ। यदि पाकिस्तानले हार बेहोरेमा भने, नेपालले भारतसँग पराजित भए पनि पाकिस्तानसँग रनरेटको हिसाबमा प्रतिस्पर्धा हुनेछ। यो खेल नेपाली समयअनुसार साँझ ७:१५ बजे सुरु हुनेछ।
