समाचार सुन्नुहोस :
काठमाडौँ – राष्ट्रपति रामचन्द्र पौडेलले ३३औँं गृष्मकालीन पेरिस ओलम्पिकमा सहभागी हुन जाने नेपाली खेलाडीलाई सफलताको शुभकामना दिँदै बिदाइ गर्नुभएको छ।
आज राष्ट्रपति भवन शीतल निवासमा आयोजित एक विशेष समारोहमा राष्ट्रपति पौडेलले खेलाडीलाई शुभकामना दिँदै बिदाइ गर्नुभयो। सो अवसरमा राष्ट्रपति पौडेलले पेरिस ओलम्पिकका ‘सेभ द मिसन’ रहनुभएका राष्ट्रिय खेलकुद परिषद्का सदस्य सचिव टङ्कलाल घिसिङलाई नेपालको राष्ट्रिय झण्डा हस्तान्तरण गर्नुभयो।
यस कार्यक्रममा युवा तथा खेलकुद मन्त्री तेजुलाल चौधरी, नेपाल ओलम्पिक कमिटीका अध्यक्ष जीवनराम श्रेष्ठ, ३३औँं गृष्मकालीन पेरिस ओलम्पिकमा नेपालका तर्फबाट सहभागी हुने खेलाडी, प्रशिक्षक, र अन्य विशिष्ट व्यक्तिहरूको उपस्थिति थियो।
