समाचार सुन्नुहोस :
काठमाडौँ – चन्द्रागिरी केवलकारमा विद्युत अवरूद्ध भएपछि यात्रुहरू अड्किएका छन्। वैकल्पिक उपायको रूपमा यात्रुहरूलाई निकाल्ने प्रयास भइरहेको छ। महानगरीय प्रहरी वृत्त थानकोटका अनुसार, केवलकारमा अड्किएकाहरूलाई निकाल्न कम्पनीले जेनेरेटर चलाउने प्रयास गरेको थियो। तर, त्यसले पनि काम नगरेपछि अब हातैले केवलकारको डोरी तान्न लागिएको छ।
समयमै जेनेरेटर चलाउन नसकिएपछि अहिले केवलकारका डिब्बामा अड्किएका यात्रुलाई डोरी हातैले तानेर तल्लो स्टेशनमा झार्ने प्रयास भइरहेको प्रहरीले जनाएको छ। वैकल्पिक उपायका रूपमा राखिएको जेनेरेटर पनि नचलेपछि कम्पनीले प्रहरीको सहयोग लिएर केवलकारका रोप्वेलाई हातैले तानेर झार्ने प्रयास गरिरहेको छ।
केवलकारमा यात्रु फसेको सूचना पाएपछि महानगरीय प्रहरी वृत्त थानकोटबाट प्रहरी टोली पुगेको छ र अहिले उद्धार प्रयास भइरहेको छ। कम्पनीका प्राविधिक र प्रहरीसहितको टोलीले हातैले डोरी तानेर यात्रुको उद्धार गर्न लागेका छन्।
