समाचार सुन्नुहोस :
काठमाडौँ – रुपन्देहीमा बस दुर्घटनामा ४३ जना घाइते भएका छन्। दाङबाट काठमाडौं जाँदै गरेको रा१ख २७८३ नम्बरको बस गए राति ११:५० बजे रुपन्देहीको सैनामैना नगरपालिका-१० सालझन्डी बजारस्थित पुलमा बिग्रेर रोकिएको लु१ख ६८७ नम्बरको बालुवा बोकेको ट्रकमा ठोक्किँदा दुर्घटना भएको हो।
जिल्ला प्रहरी कार्यालय रुपन्देहीका सूचना अधिकारी डिएसपी मनोहर प्रसाद भट्टका अनुसार, दुर्घटनामा बस चालक र यात्रुसहित ४३ जना घाइते भएका छन्। घाइतेहरूलाई चौराहा हस्पिटल बुटवल, एडमनसिटि हस्पिटल बुटवल, र हिराचन्द्र हस्पिटल सालझन्डीमा उपचारका लागि लगिएको छ। आइतबार बिहानसम्म १९ जना डिस्चार्ज भइसकेका छन् भने अन्य २४ जनाको उपचार जारी छ। बसका सहचालक गम्भीर घाइते भएका छन् र उनको पहिचान खुल्न सकेको छैन।
