समाचार सुन्नुहोस :
काठमाडौँ – १५ वर्षअघि बोक्सीको आरोप लगाउँदै कुटपिट गरी हत्या गरेको आरोप लागेका दुई जना पक्राउ परेका छन्। काभ्रेको रोशी गाउँपालिका-३ का ४४ वर्षीय टंकबहादुर मगर, ४२ वर्षीय सन्तबहादुर मगर पक्राउ परेका हुन्।
उनलाई काठमाडौं उपत्यका अपराध अनुसन्धान कार्यालयको टोलीले पुस २४ गते पक्राउ गरेको हो। पक्राउ परेका टंकबहादुरको स्वास्थ्यमा समस्या आएकाले उपचार सकेर शुक्रबारमात्र जिल्ला अदालत काठमाडौंमा बुझाइएको काठमाडौं उपत्यका अपराध अनुसन्धान कार्यालयका प्रहरी उपरीक्षक मिलन केसीले जानकारी दिए।
उनीहरूले २०६५ असोज २९ गते शिखर आम्बोटे गाविस -२ हाल रोशी गाउँपालिका-३ को चमारसिंह मगर भन्ने जनकबहादुर मगरलाई बोक्सीको आरोप लगाई कुटपिट गरी हत्या भएको थियो। त्यसयता उनीहरू फरार थिए। मृतक जनक उनिहरुका नातेदार हुन्। प्रहरीले दुवैलाई काठमाडौं जिल्ला अदालत उपस्थित गराएको छ। लामो समयको खोजीपछि प्रहरीले १५ वर्षपछि पक्राउ गरेको एसपी केसीले जानकारी दिए।
