काठमाडौं – यति एयरलाइन्सको आजका लागि तय भएको सबै उडानहरू स्थगित भएका छन्। हिजो उक्त विमान कम्पनीको चालक दलका सदस्यसहित ७२ यात्रु बोकेको ९एन–एएनसी विमान पोखरा अन्तर्राष्ट्रिय विमानस्थलमा दुर्घटनामा परेको थियो।
उक्त दुर्घटनामा ज्यान गुमाएका यात्रुको शोकमा यतिले आज सम्पूर्ण उडान स्थगित गरेको हो। यद्यपि आपत्कालीन र उद्धारका उडान भने हुने कम्पनीले जनाएको छ। पछिल्लो अपडेटअनुसार विमान दुर्घटनामा हालसम्म ६८ जनाको मृत्यु भएको पुष्टि भइसकेको छ। चार जनाको अवस्था अझै अज्ञात छ।
यस्तै आज विमान दुर्घटनामा ज्यान गुमाएकाहरूको शोकमा सरकारले सार्वजनिक शोक बिदा दिएको छ। हिजो बसेको मन्त्रिपरिषद्को आकस्मिक बैठकले आज शोक बिदा दिने निर्णय गरेको थियो। सरकारको बिदा दिने निर्णयको चौतर्फी आलोचना भए पनि निर्णय बदर भएन।
