काठमाडौँ – झापाको दमक–६ स्थित नमुना बजारमा रहेका नौ पसलमा आगलागी हुँदा लाखौँ मूल्यबराबरको क्षति भएको छ । वडाध्यक्ष टेकबहादुर थापाका अनुसार आज बिहान करिब २ बजेतिर अचानक आगलागी हुँदा पसलका सम्पूर्ण सामान जलेर नष्ट भएको थियो । मुख्य बजारका ती ठाउँमा जुत्ता तथा कपडाका पसल रहेका थिए । आगलागीबाट जुत्ताचप्पल व्यवसायी राज श्रेष्ठको पसलसहित नौ पसलका सम्पूर्ण सामान नष्ट भएको उनले बताए ।
आगलागीको कारण खुल्न सकेको छैन । विद्युत् सर्ट भई आगो लागेको हुन सक्ने प्रारिम्भक अनुमान गरिएको इलाका प्रहरी कार्यालय दमकका प्रमुख प्रहरी नायब उपरीक्षक दिलीप गिरीले बताए । क्षतिको विवरण संकलन गर्ने कार्य भइरहेको उनले जानकारी दिए । दमकसहित कमल, गौरादह र कानेपोखरीका वारुणयन्त्रको सहायतामा प्रहरी तथा स्थानीयवासीको प्रयासमा करिब तीन घण्टापछि आगलागी नियन्त्रणमा आएको थियो ।
