काठमाडौं – अमेरिकी प्रतिबन्धका कारण ह्वावेले फाइभजी स्मार्टफाेन उत्पादन गर्न सकेको छैन । ह्वावेलाई आफ्ना कुनै पनि कम्पनीले सामान बिक्री गर्न नपाउने गरी अमेरिकी सरकारले रोक लगाएको छ । जसका कारण ह्वावेले फाइभजी सपोर्ट गर्ने चिप प्रयोग गर्न पाएको छैन ।
कम्पनीले हालसम्म क्वालकमसँगको पुरानो सम्झौताका आधारमा फोरजीका लागि आवश्यक चिपसेट खरिद गरिरहेको छ । त्यसैका आधारमा फोरजी स्मार्टफोन बजारमा उपलब्ध गराउँदै आएको छ ।
यस्तोमा फाइभजी विस्तारमा सबैभन्दा अघि रहेको चीनमै ह्वावेलाई अन्य कम्पनीसँग प्रतिस्पर्धा गर्न कठिन हुँदै गएको छ । फाइभजीको बढ्दो प्रयोग र नयाँ प्रविधिका मागलाई ध्यानमा राख्दै कम्पनीले आफ्ना प्रयोगकर्ताका लागि वैकल्पिक उपाय भने उपलब्ध गराएको छ ।
कम्पनीले आफ्ना प्रयोगकर्तालाई लक्षित गर्दै मोबाइल कभर सार्वजनिक गरेको छ । फाइभजी मोडेमउक्त मोबाइल कभरको सहयोगमा प्रयोगकर्ताले सहजै आफ्नो मोबाइलमा फाइभजीको मज्जा लिन सक्नेछन् । हालसम्म यो सुविधा ह्वावे पी५० प्रोमा मात्रै उपलब्ध छ । विस्तारै ह्वावे मेट ५०, मेट ४०, नोभा ९ र नोभा १० सिरिजका फाेनमा समेत उपलब्ध हुनेछ ।
कम्पनीका अनुसार फाइभजी मोडेमयुक्त मोबाइल कभर हाल चिनियाँ बजारमा उपलब्ध भइसकेको छ । साथै कम्पनीले फाइभजी विस्तार भएका अन्य मुलुकमा समेत उपलब्ध गराउने जनाइएको छ ।
अन्तर्राष्ट्रिय बजारमा यसको मूल्य १२० डलर (करिब १५ हजार रुपैयाँ) तोकिएको छ ।
